أنا من قنا .. للشاعر مصطفى هاشم الجابري

القصيدة تعريف مبسط عن مراكز محافظة قنا من الشمال إلى الجنوب
..
سألتني مــــايا منين أنا
قولتلها أقــــولك مين انا
أنا يا مـــــــايا من هنــاك
من أرض أبــويا وجـــــدنا
.......
أرض النخيل والنيــل وأنا
أرض التراث أرض المنى
أنا يا حياتي من هنــــاك
أنا يا حبيبتي من قنـــــا
........
لو تعـــــرفيها تعشــقيها
للحبايب .. ترسميها
زي واكتر توصفيها
وتقولي جنـــة ربــــنا
......
أنا يا حبيبتي من هنــاك
من أرض أبــويا وجـــــدنا
أرض النخيل والنيــل وأنا
أنا يا حبيبتي من قنـــــا
...
نبني السعادة بالعمــــل
بإدينا نرســــــم حلمنـــا
عايشين على بسمة أمل
شاكرين لنعمـــة ربنـــــا
.......
أنا نفسي مايا تكون معايا
في زيارة لمحافظة قنـــا
سعتها تنسى الدنيا مايا
ودنيـــتك تصبح هنــــا
.......
في أبوتشت كل الناس سوى
بالحبـ نجمــع شملنا
والنيل يا مايا والهوا
أول مدينة فى أرضنا
.......
فرشوط يا مــــــايا بَعدها
زهرة ربيعـــــــــنا كلــــنا
ما يغركيش فين بُعــــدها
فرشوط منـــارة قـــــربنا
.......
والنجع جنة بســــحرها
سكر عسلها حلونـــا
بلد المصانع حـــرها
زي النسيم لو مـَرنا
.......
هنا مركز الوقف اللي غالي
والتاريخ اللي أتبــــــــــنا
من قرية كانت صوتها عالي
أصبحت مركز بـُنا
.........
وتشوفي دشنا وأهلــــها
وشـــــــموخ ولآدها وعزنا
شهدت فرنسا زمان لها
تدشين سفنهم كان هنا
..........
وده جامع الســــيد يا مـايا
له تاريــخه في قلــــبنا
على بابه تنسي انك معايا
أوعي تنسي مـــين أنا
..........
وأخدك وأروح قفط الحبيـبة
أقدم مـدائن مصــــــــرنا
هزمت فرنســا بكل هيبة
النصـــر كان من عـــــندنا
.............
وحافرجـك على أرض قوص
أقـــــــــــــدم معــابر مصرنا
من غيرها كان الكل يلوص
قفطاي بنـــــاها في عزنا
...........
ونكمل السهرة ف نقـــادة
كان فيها وحــــــدة شعبنا
بلد النسيج بلد الإرادة
نقادة جمعت شملنا
.........
وهنا اسمحيلي ما بدهـــاش
حتمــا نروح إنتِ وانا
بصتلي مايا بندهاش
وقالتلي ينصر دين قنا

..........
كلمات مصطفى هاشم الجابري

» انا من قنـا . شعر مصطفى هاشم الجابري
» انت دينـك أي دين .! مصطفى هاشم الجابري
» سماها القـدر " شعر " مصطفى هاشم الجابري
» لقاء ع الهواء " شعر " مصطفى هاشم الجابري
» أغنية " بحبك قد أيه " مصطفى هاشم الجابري