فين الولد

فين الولد
بقلم
أحمد عطا
..........

يا شايله فوق كتافك هم
ولسه الآهه جواكى
يا غرقانه فى قهر وظلم
وكل الدنيا سمعاكى
ولا الفاجر عايز يتلم
ولا عيالك مساعداكى
خلاص أرضك رواها الدم
وزاد غمك وغطاكى
صحيح إنتى الأساس والأم
لكن الإبن رباكى
وباع عرضك لولد العم
وعامل نفسه وياكى

.
يا عايشة من ألوف وألوف
ودلوقتى محلك سر
وطول عمرك ماليكى الخوف
ولغزك عدى مليون سر
وفيكى الشهم عاش مكسوف
ومش لاقى حقيقه تسر
ظلامك خلا أعمى يشوف
حاجات تخجل حاجات تحسر
يا ماشيه سكة المخلوف
ومش لاقيه ولد ينصر
يبدل منكرك معروف
يرمم رمح متكسر
.
تعالى نعيد سوا مجدك
ونتقدم ونتخطى
يا غاليه مين هنا قدك
تعالى نحطم الواسطه
ومدى إديكى لنشدك
ونختارلك ولد اسطى
يسوق بينا يصون عرضك
نعدى محطه بمحطه
وربى ما حد هيصدك
وربى ماحد هيصدك

جميلة ورائعة من شاعر رائع
ولا اتفق معك في ( باع عرضك لولد العم )
ان بعض الظن اثم ولا يرقى هذا الى يقين
  

محمد ابوالليل كتب:

جميلة ورائعة من شاعر رائع
ولا اتفق معك في ( باع عرضك لولد العم )
ان بعض الظن اثم ولا يرقى هذا الى يقين
  

الأخ العزيز والشاعر المتميز أ . محمد أبو الليل
أسعدنى كثيرا مرورك الكريم
وتعليقك الواعى
كما أسعدنى أكثر نقدك الموجه والبناء
وللحق والتوضيح
يعلم الله أنه ليس إسقاطا على شخص بعينه أو صاحب فكر معين
وإنما المقصود بالعبارة ضعاف النفوس ومن عميت بصائرهم وزاغت أعينهم فباعوا قيمهم وأرضهم وعرضهم مقابل بعض المال
وإنهم بالفعل ندرة
إلا أنهم موجودين بالفعل على مدار الزمن والتاريخ يحدثنا كثيرا عن أشخاص تحمل هذه الصفات
وينعتهم بلفظ العملاء
أسأل الله أن يجازيهم بعملهم
وان تكن صورتى التى وددت إيضاحها قد وضحت
واعتذر لعدم توفيقى فى اختيار عبارات أكثر تعبيرا
ودمت بكل خير