من غير دليل .. ضياء الدين البري

السلام عليكم .. كلام من قلبي

من غير دليل
.....

هوّا انت مين .؟
وفْ نيّـتك توصل لفين.؟
عشان تجيب سيرة الحمير
عرفتهم .؟
جت لك ظروف وعاملتهم .؟
صاحبتهم .؟
يبقي الكلام من غير بيان
زيّ الرُّجم ويكون تـُهم
فهمت شيء عن أصلهم .؟
عشان تزيد وتعيد كتير
الكل عارف إنّهم ..
من طبعهم ..
لايعرفوا معني القدر
ولا يفهموا قيمة الهمم
كتير يحبّوا نفسهم
ونسيوا شيء اسمه الضمير
وانت ياريت ..
مهما اتسقيت ..
من سمّهم مر وهوان
انسي الْ عدّي والْ كان
وفْ كل آن
إوعاك تفكر زيّهم ..
خلـّيك ملاك وفْ توب فقير
لأنّك انت عكْسهم
إنت الشّجيع وقت الخطر
واوعاك تلومني ..
أوصُحبتك تبعدها عنّي
واقـْبلها منّي ..
لأني عارف إنّـهم ..
شطبوا الأصول من عرفهم
والنبض برّاهم طفش
هدموا الزرايب والطوايل
ودهوسوا كل الحيطان
دول غيّروا شكل المكان
زرعوا النجيل جوّا الغيطان
نهبوا المحالج والمغازل والوِرش
ومّا الخزاين عمّروها بالحرام
من غيركلام ..
جرْيوا قوام ..
قلعوا البرادع والحوافر واللجام
دول قطـّعوا صلب الكيان
وقسّموها بالميزان
من طبعهم فـَجَره ولئام
لأنّهم من غير أوان
نسيوا السّـقِـيـّه م الترع
نوم المصاطب والعشش
محشي الكانون وعرصة الأفران
طشت العجين وقـُللة العطشان
لبن الشّوالي ووصفة العطـّار
لأ وإيه ، خاصموا النهار
إتعلموا فنون السّهر
واتعودوا نفخ السّيجار
مايهمّش اللون والتّمن
عشان دا نوعه مفتخر
دول صاحبوا أطلال الزمن
واتعوّدوا جلب المحن
زرعوا الفتن ..!
تطرح أهات ف قلوب بشر
جنين وصابه كتيرعطب
هرسوا المعسّل في العجير
طحنوا الهباب جوّا الشعير
دفنوا التاريخ ف جوّا بير
بعد النجيله والدنيبه والحطب
فجأه لقيتهم غيّروا أكل النـُّخاله بالفطير
من بعد خيش
يدّاروا فيه وقت اللزوم
عرفوا مزاج شـُرْب الحشيش
والبردعه متفصّـله من خيط حرير
عايشين حياة أبّهه
دلع حداقه وزهزهه
ع الشط سكر ولعلعه
نسيوا وتدهم ع الحيار
والمرمغه فوق الرمال
حتي الدّواره ع الـمدار
شـَدّ النوارج ع الغلال
ف الكارّو بيسوقهم عيال
كرباج يمين ، كرباج شمال
ويْأدبوهم بالشِّـعَبْ
نسيوا المحشـّه والبـُلط
قطـّوشه متفصـّله من صوفة الخرفان
ناف السواقي والغما والترعه والحوّال
والراكيه والموال
ملـْـس القنايه والشادوف
داسوا العمامه ..
والكمامه ..
وفلانكة الطنبور
إتعلموا فن الخُـطب
وطوّروا لحن النهيق
دفنوا الدريس جوّا القبور
داسوا الكواكب في السما
قلعوا خلاص سرج وغما
حرقوا الذراويه والغلال
فاس الشراقي والشقارف والروال
والمدْره والمحرات
نسيوا المناجل والراكيه والموّال
وضيّعوا وقت الحصاد
قلعوا خلاص زعب الغبيط
دول نسيوا حتي إسم غيط
بعد العبايه والرنّه بالخلخال
لبسوا الغوايش والخواتم وانسيال
والحدوه تلمع بالدّهب
يبقي انت ليه.؟
من غير دليل
بتقول كلام .؟
يشغل قلوب من غير سبب
نتلام عليه
والشك فيه
ياعم داحنا اشبعنا لوم
عايز نهارنا يبقي ليل.؟
والليل وراه تيجي الغيوم.؟
عصافير وننسي الزقزقه.؟
الخيل يبطل دقدقه.؟
ماكفايه حقد ع الحمير
أصل الحياه
مش ناقصه زوم
الفقر طافش م الهموم
دا حلف تاه وسط الغيوم
طول عمره عايش خندقه
في الشرنقه
ساكنين كهوف محندقه
صاحبوا الديابه والتعالب والقرود
حتي الجوارح والزواحف والفهود
راسمين حياة مترستقه
وللمزاج متشوّقه
أدوار كتير متوضّبه
وللهدف مترتّبه
ناويين في يوم هدّ السدود
ويفصّلوا تاني الحدود
ويقسّموها كتيرعزب
بـس الأسود ..!
جوّا الحديد متلجّمه
عاليه الهدير والهمهمه
وكتير صحاب من كل لون
بهيّه ناسها الطيبين
مهما يكون
وقت النّدا الروح تهون
أصل الحياه متقسّمه
وبأمر رب العالمين
وبالصلاه علي الأمين
كله يهون

....

كلمات جميلة ومعبرة
شاعرنا الاستاذ ضباء
بارك الله فيكم
عزفتم لحنا رائعا
وصوّرتم فأبدعتم
لكم تحياتى

أخى ضياء دائما رائع يا صديقى
قصيدة راقية بالفعل
تقبل خالص ودي

» من غير دليل .. ضياء الدين البري
» من غير دليل ..شعر : ضياء الدين البري ..ردا على : مفاوضات
» يااااااااااااااااأمتي....ضياء الدين البري
» من غير إحم يابا .. ضياء الدين البري
» ليه تلوموني....؟ ... ضياء الدين البري