الموت

الموت
.......................
الموت لو قادر
يسرق أجساد حبايبنا
ويمحيها
ويلغى وجودها
من كل دواير الطول والعرض
الموت لو قادر
يحرم عينا من رؤيتهم
واننا ناخد القوة من طلتهم
ولأن الموت داير عل الكل وفرض
قررت
وبكل مافيا من انسان
وبكل حواسى الخمسه
الساكنه فى شقوق رجليا
الزعلانه دايما منى
الملويه
انى أقول للموت ماتقرب
يمكن قربك
يجعل منى البطل القومى
ويسكنى ف بحر عيونها
وتعرف اني عمري ماأخونها
وان القمر
رمش عيونها
وان صخور البحر
الموجوده وسط الميه
مش بالصدفه
ولا زي ماقالونا العلماء
رواسب أرضيه
من الطمى
الهربان من نهر النيل
وان النيل بيصب الميه العذبه
جوة البحر
لو كان فعلا
يبقى حلال
أشمر كمى
وأعلن اني
هجهز نفسى للصلوات
بس الميه المالحه
بتحرق لونى
لما الشمس بتضرب فيا
والجنيه
قاعده على الصخره علشانى
قال عيزانى
أروح وياها
وبتحلفلى وبتتحلف
ان أنا أصبحت مناها
وان الجنى الساكن فيها
قال مسامحنى
بتريحنى
علشان أجري بسرعه معاها
وان العرش فاضى ومستنى
اشاره منى
وانى راح اخد الجنسيه
وان الموت راح يهرب منى
جايه تلف قال وتغنى
فكرانى انى
الفرفور حيلة أمه
المدلع
وان المفاتيح ال ف ايدي
مفاتيح اخر عربيه
اه لو تعرف
انى من حر الشمس مولع
وان نسيت كلمة أحلام
وان العشق بالنسبالى
وهم وأساطير
وان الهم الأكبر ليا
هو المم
شايل الطين
مغروس فى الهم
وانى بحايل عم الموت
يتوسطلى
عند القبر
يحجز ليا ميعاد مستعجل
فاض الصبر
وان حبيبتى مسيرها هتعرف
ان وفاء الدنيا ف طبعى
وانى بعد دخولى لقبري
سايب ليها
كل حواسي الخمسه
ف روحي
وان الجنيه دى أسطوره
وان البحر هيفضل مالح
مهما النيل هيغذيه ميه
وان الظلم هيفضل كاسح
مهما العمر هيطول بيا
وانت ياعم الموت ماتقرب
أرجوك قرب
لأنى خلاص .........أنا فاض بيا
...........................
شاعر الاحساس
عبدالتواب الرفاعي

حاله تمر بالكثيرين
عبرت عنها كلماتك باسلوب جميل
الهروب للمجهول والخوف المجدول بانتكاسات الروح الحالمه بيوتوبيا المفقوده
هذا ما قرأته بين سطورك
فتقبل تحياتى

شكرا لمروركم

شكرا عم عادل الشاعر الكبير