حفلة طلاق

حفلة طلاق
........................
يوم الخميس الجاي
الساعه واحده
عندنا حفلة طلاق
يوم الخميس الضهر
الكلمه واحده
والاجتماع بعد الفراق
والحفله فى مركز شباب
حفلة طلاق والمعازيم
لابسين بدل
لابسين عمم
أو حتى لابسين فساتين
الحفله فيها الدعوة عامه
وهتبقى هيصه وتبقى لما
لما نكون متجمعين
علشان طلاقها
والطلاق من غير قسيمه
من غير مؤخر راح يندفع
هنطلق الفرقه اللى بينا
والحب يرجع فى القلوب
عالى ومرتفع
هنطلق كل شئ بينا....بيجيب الاختلاف
مليون خناقه وألف عركه
عريناها وعريناها
سيبناها وقت البرد
من غير لحاف
ووقت الرصاص لماعلى والدبابات
الكل خاف
الكل جري من الرصاص
حتى اللى شاف ..........جسمها
الكل نسى اسمها
وأتحدى كل الكراسي المزيفه
مين ف يوم زي الغلابه
نام وشايل همها
مين اللى عاش رافع رايتها
مناه يحقق حلمها
مين ابنها؟
من بطنها
ومين لقيط
مين بيركب فوق حلمنا؟
عامل عبيط
يبقى لازم كله يحضر الاحتفال
والاحتفال هيكون فى حفله
بس حفله جديده خالص
حفلة طلاق
,,,,,,,,,,,,,,,,,,,,,,,,,,,,,,,,,,,,,,,,,,,
شاعر الاحساس
عبدالتواب الرفاعى

   
احييك من قلبي علي هذا النص الرائع
ويسعدني ان اكون صاحب اول تعليق علي هذا الابداع
دام ابداعك....

اشكرك بهاء الدين محمد

تسلم حبيبى عادل الجندى

دي حتبقي احلي حفة طلاق في العالم واعتبرني اول المعازيم

طلاق الفرقة والاختلاف وزواج العقل والحكمة والحب والوحدة

ربنا يحميي بلدنا ويجمعنا دائما علي حبها

بارك الله فيك

تقبل تحياتي

هتنورينا والحفله فى مركز شباب روض الفرج يوم الخميس الساعه واحده

كلنا مصريون وهنتجمع تانى
................................................................
دعوة نتلم بجد من تانى ونلحق بلدنا م الضياع
...........................................................................
دعوة لصالون صوت الشارع يوم الخميس القادم 29\8\2013
........................................................................................
أدعو جميع الأدباء للحضور ودعوة الجميع فى مركز شباب روض الفرج الساعه 1:00 ظهرا
..........................................................
مصر فوق الجميع..............................................
..........................................
شبك صوابعك
................................
شبك صوابعك كلها
فى ادين اخوك
واعملوا حصن بالتحدى
هيموتوه ويموتوك
خليكوا أقوى من الفتن
هيدمروه ويدمروك
والبسوا كل الهدوم زي بعضها
متلونه بلون العلم
خلوا البياض فى وسطكم
وارموا السواد بكل ظلمه وقهرته
تحت الجزم
وخلوا لون الدم الاحمر
ورا ضهركم
واشتروا ست الحبايب كلها
ماتشمتوش فيها العدا
كتير أوى فاض صبرها
هتموت كدا
هيجيلها جلطه منكم
من ظلمكم
من بعدكم
ليه تسيبوها مستغربه
متحيره
تايهه مابينكم كلكم
ماكلكم من بطنها
والكل شاهد انها
تعبت أوى فى حملكم
شقيت عليكم تلاتين سنه
وسنين كتير كات قبلكم
دالوقتى ليه بتهون عليكم
بتقتلوها وباديكم
شبكوا يلا الأيادى
اتوحدوا
خلوا فجر الحب يخرج للحياه
خلوا فجر الحب يداوي ألف اه
بالله عليكم كلكم
هفضل أعيد وأقولكم
اتوحدوا
واتجمعوا
بالله عليكم ترجعوا
لحضنها
ماتشمتوش فيها العدا
.................................................
شاعر الاحساس
عبدالتواب الرفاعي

شكرا استاذ حسن الجمال والاستاذ محمود جمعه