عتاب النيل

موضوع: عتاب النيل الأربعاء يونيو 05, 2013 3:32 pm

عتاب النيل
(بمناسبة سد النهضة : ألا نصون النعمة ؟ أم ننتظر الزوال ؟! )

عتاب النيل

سنين وقرون وبتعدي
وانا حافظ لكم ودي
لا طنشت المعاد مره
ولا جت ميتي مره
وكان موجي زلال صافي
ورملي يشبه الدره
وكان النور على ضفافي
يخلي الحب يتكلم
حنين صافي
وكنت الوحي للشعرا
وكنت السلوى للمجروح
يقول يا ليل
ولما الليل ما يسعفهوش
يقول يا نيل
يلاقيني
بضمه ضمة المشتاق
واريح قلبه م الأشواق
ولو رسام
يخاصم صفحته الإلهام
وريشته تشتكي مره
ضياع الفكر والإبداع
يجيني يشتكي حاله
يروق الحال وتحلى له
فنون الرسم فوق شطي
***
وفاتت ع الصفا الأيام
ومعرفشي جرى لكم إيه
زباله اكوام
تفوح ع الشط وتغطي على عطري
وخط مجاري جاي يجري
يسممني
تموت أسماكي وتعاني السموم بطني
وكان نفسي أدوم صافي
من الأجداد إلى الأحفاد
لكن مصانعكو مش عايزه
بتتسابق على قتلي
كأن اللي هـ يقتلني
هـ ياخد م الشيطان جايزه
وحتى الترعه بنتي اللي مليش غيرها
خنقتوها
تروح ترمي الزباله شروق
تحصلها كمان فايزه
وإيه أخرتها يا أهلي
وإيه أخرتها يا ناسي
نسيتو العهد وتلوموا
وانا ع العهد مش ناسي
وتيجو تشتكوا الأمراض
دي بلهارسا وفيرس سي
ودا هم الدسنتاريه
وأمراض بالحفان جيِّه
وتيجوا تلوموا على نيلكم
وانا المظلوم
ومجني عليَّ بصرخ من عمايلكم
دا أنا رغم الأذى باقي
على عهدي وأشواقي
بألِّف أغنيات الشوق واغنيلكم
أنا نيلكم
خالد الطبلاوي
...............
...

............
...........

موضوع: رد: عتاب النيل السبت يونيو 08, 2013 10:48 am

اخى الشاعر الجميل

خالد الطبلاوى

والله كنت اتوقع فى نصك ان تتحدث عن ماحدث لمصر

وماسوف يحدث فى حالة بناء سد النهضه الاثيوبى ..

وموقف الرئاسه المهين تجاه تلك القضيه .

ولكن استعرضت قضيه عانينا منها لاكثر من خمسين عاما

ومازلنا نعانى . ولكن الفاجعه الكبرى هى :

هل سيكون له وجود ؟؟؟؟؟؟؟

مودتى وتحيتى ...