العالم الأول ؟! . . هاء أو . .

العالم الأول ؟! . . هاء أو
ديموقراطية ف بحر و جو
حرية لكلاب تنهشنا
و فى القَـفَـص فَرْخْ يصَوْ صَوْ
. . . . . .

يتلَّـموا عالريِّس منهم
يـظَبَّـطـوه و يأمِّـنْهُم
مِن دَم شَعْـبُه يسَمِّنهُـم
على أد ما يطَاطِىى بِـيِـحلَّو
. . . . . .

خايفين على بنوكهم تِـفْـضَى
و مش مُهِمْ شعوب تِرْضَى
دا أكْلْ عِـيشهُـم فى الفوضى
و رِزْقْ صُـبْـيانهُـم في الهَبْو

يِلَبِّسوهم أحْلَى وْشـوش
يِـتْـعَـشِّـموا بِـتِـيـجان و عروش
يتعلموا أُمور حلَّق حوش
و يقتلوا ولادهم بالسهو

العالم الأول ؟ هاء أو
. . . . . .
يبيع سلاح ياخُد بترول
صَديق حَميم و كلام مَعسول
و لما يُـقَـع العِجْل يقول
أنا كنت ضد نظامه السَّوْ
. . . . . .

دول صَدَّعونا حقوق إنسان
ناس نصابين لابسين فُرسان
حِصار و فيتو و قَصْ لسان
أو عَزْلْ أو عُقُوبات . . أو أو
. . . . . .

بِنِـسْـتِـلِف من أموالنا
و بالـرِبا نربى عيالنا
و يكَرَّهونا ف أحوالنا
تَعْلالى يابا . . أبوك ؟ . . جَكْ بَّو
. . . . . .

يِنَضَّفوا قُـدَّام بيتهم
و يحَـدِّفونا بزِبالتهم
و إللى يهوِّب ناحيتهُم
جمب الحيطان يمشى ينَوْ نَوْ

العالم الأول ؟ هاء أو
. . . . . .

للقَرْصَنة أشكال أكتر
مش بَسْ عين عورة و خَنْجَر
دا بالقانون . . جوَّع . . دمَّر
يِعْدِلْنى ع القِبْلا و في التو
. . . . . .

شايفين نهاية تَـلْبيخهُم
فى ميت سنة . . إقروا تاريخهم
حُكَّام طُغاة من تفريخهم
ختموها بالضلمة و بالعَوْ
. . . . .

يِأمِنوا لهم حبايبهم
و يلعبوا سيِب و أنا سيبهم
كأنهم من نَسَايبهم
و نِطْلَع إحنا ولاد الهَوْ
. . . . .

إيه حلَّا أحفاد القِرَدَة
يِتْمَرْمَغُوا ليه في الخير ده
و إنتو إللى حاتلِمُّوا الفِردة
أما المعارضة !! دى كُفر و لغو
. . . . .

يا نِنْكِـتِم لما نِسَوِّس
يا نِبْقَى بِنْعِـيب و نْلَوِّثْ
شايفين و طننا بيتحَرْوِس
و في النفق ولا نتفة ضَو
. . . . .

حاصبُر كِتير على كده لمَّا
يرموا لى بقرارهم لُقمة
و قِمة بتغازل قِمة
و أنا مالى باللوبى و بالبهو

خلِّينى من عالم رابع
سابع . . و مش حابَّة تواضع
ماكونشى من لَـبَـنِـك راضِعْ
يرْكَعْ قُـصادى وأقول له . . و لَوْ

العالم الأول ؟ هاء أو
. . . . .