آخر رمق (قصة قصيرة )

آخر رمق

(قصة قصيرة )

سنارتان طويلتان وطعم قوى ولم تخرج سمكة واحدة من ساعة ! لماذا أنت قلق على رزقك اليوم – على غير عادتك ؟ ربما لأنك لم تغن للأسماك، ولم تحك لها حكايتك الشجية، ربما خاصمك النهر، صالحه! غنِّ له يا رجل‘ غنِّ !
ربما الأسماك الآن قابعةً تأكل الطعم فى سكينة ، هو رزقها ، اسحب السنارة كل فترة ! ربما تنال السنارة من سمكة كبيرة وهى تجهز على آخر طرف من طعمك الرخو ، وتنال بركة الماء .
أخيراً وقعت فى يدى يا لئيمة !!
أول الصيد سمكة ، الثانية، الثالثة، الرابعة انتظرى فى أسرك حتى أضع طعم سنارتى! انتظرى! والآن اخرجى بسلام.. لن أدعك تهربين !
أيها الموج الرفيق ما أحلى أوتارك وهى تعزف على الصخور أنغامها الحلوة . أنت الآن وحدك. أبداً، كل شيء هنا صديقك : السماء والبحر وحبال الغسيل التى تمدها فى ركن حجرتك المكتظة بالصور خوفاً من اطلاع الجيران على ملابسك.
"وماله لما تسيبك الحلوة الغندورة وتعرف راجل تانى ؟! انت كنت منتظر منها إيه ؟ وليه تقدر مشكلتك وهى عاجزة عن مواجهة نفسها قدام صاحباتها لما يقولوا لها : تتجوزى عاجز يا خايبة؟! هو انت وحشه ولا بايره؟! أيوه هى بكت شويه وخلاص . جمد نفسك يا واد ! انت راجل. انت مش محتاج لحد ، انس انك كنت بطل رياضي وصورك بتملا الجرايد . ماحدش فاكرك ياعم؟!
موجه تشيله وموجـه تحطه الــمقــادير بتغّــير خطـه
تايه أومش عـارف شطـه عمــرك مـش أكتر من قارب
اطلعى يا سمكه، رزق النهارده كتير، وسيبى بكره لرزق بكره, السمك الصغير لأصحابك القطط والكلاب، هما محتاجين له أكتر من البحر ..
كانت عادته أن يتساند على كفيه وساعديه ، وينزل إلى الأرض ويترك مقعده المتحرك خلفه حتى يكون حرا فى حركته ، ويكون قريباً من مستوى النهر.
الشنطه اتملت سمك ، نشيل الشنطه ونعلقها على الكرسى فى الدراع كويس، ونتوكل على الله، إيه ؟! إيه؟!
فين الكرسى ؟ الله ! الله ! يانهار أسود ، راح فين ؟ فين رجلىَّ !
لا حول ولا قوة إلا بالله.. القطر موت الراجل .. لأ يا أخى لسه فيه نفس.. الله يصبره.. مسكين رجليه اتقطعوا.
اليوم تذكر قدميه ، كان مقعده قد أنساه كارثة بتر ساقيه ، بعد أن قضمهما القطار ، كانت أنفاسه الحارة تحرك الرمال بخفة ، والظلام يمسك بخناق المكان فيظلم شيئاً فشيئاً، والشمس تفرش حمرتها على الماء الذى توقف موجه ، وبدأت كشافات الكهرباء ترسل أشعتها مع انسحاب النهار خجلاً، ولم يكن يسمع سوى زفيره وشهيقه وهما يجاوبان رجع عجلات السيارات المسرعة على الطريق الغاضب.
ظل طويلاً حتى أيقظه ظلُّ رجلين يحيطان به ، ينقر أحدهما على كتفه برفق :
- إيه اللى مقعَّدك هنا ؟
- مستنى حد؟
فتح عينيه ونظر لكل واحد منهما ثم قال بهدوء :
- سرق أحدهم أقدامى و رحل .
- الرجل اتجنن ، سرقوا إيه ؟
- وحِّد الله، الدنيا مش مستاهله الواحد يقهر نفسه عشانها كده .
- إيه الموضوع ؟
- رجلىَّ مقطوعه، اكتشفت إن حد غافلنى – وأنا مشغول بالصيد - وسرق الكرسى بتاعى وهرب، هى دى المشكلة ببساطة .
- نعمل إيه ؟
- نوديك البيت؟
- لا ، ودونى القسم وانتوا بالسلامه .
فكر الرجلان فى تركه ، عرضا عليه أن يشتريا مقعداً على حسابهما ولكنه رفض بعد أن شكرهما، وقال لهما : أريد مقعدى !
حملاه وسارا به مجهدين إلى أن وصلا إلى مكتب الضابط ذى الرتبة الصغيرة ، وأمام دهشة الجنود وارتباك الضابطين كان الرجلان قد ذابا فى الزحام الأبله .
افتح محضر :
- اسمك وسنك وعنوانك ؟
- يوسف رياض النادى ، 35 سنه، 15أ مساكن عين شمس.
- خيرا يا أخ يوسف ؟
- سرقوا الكرسى بتاعى وهربوا .
- انت بتتهم حد ؟
- لا.
- امتى حصل ده بالظبط؟
- من ساعتين أوتلاته مش فاكر .
- و إيه اللى جابك من هناك لهنا ؟
- ما فيش هناك ميه اصطاد فيها .
- إيه أوصاف الكرسى ؟
- كرسى عادى ، بيستعمله اللى زى حالاتى ، بص !
- آسف ! أقصد هل كان معه شىء مهم ؟
- أيوه ، مسجل صغير وعلبة مناديل والمحفظه وفيها 30 جنيه وعلبة مربى و إزازة ميه و ..
- كفايه ! اطمئن يا أخ يوسف ! بعد تحريات سريعة ومكثفة ، هيرجع لك حقك فى أسرع وقت .
- الله يطمنك .
- اتفضل أنت بالسلامة واحنا هنقوم بواجبنا !
- وامتى يكون أسرع وقت ؟
- النهارده أو بكره .
- عظيم ! أنا معاكم هنا لحد ما تلاقوا الكرسى .
عجز قاتل أثقل جسد الضابطين ، عشرات استجوبوا ، وبيوت فتشت ولم يظهر الكرسى.
لاحظ الضابطان أن يوسف لا يطلب شيئاً، أكلا ولم يشاركهما الطعام، ولم يطلب كوب ماء .
- انت ليه واخد مننا موقف ؟
- أبداً !
- كل معنا !
- من المؤكد أنك عطشان !
- أيوه أنا جعان و عطشان ، لكن ما أقدرش آكل أو أشرب !
- ليه ؟
- لو أكلت أو شربت هاحتاج أدخل الحمام ، مين منكم عنده استعداد يتحمل يدخل معايا ؟!
- أنا أقدر اتحمل . اتفضل كل ! اتفضل !
- أنا ماأقدرش اتحمل اكشف نفسى على حد .
كانت الإجابة كالصاعقة، ترك الضابطان طعامهما، وأمرا العسكرى أن يحمل لفة الطعام بعيداً، وهما يهمسان
بصوت بدا كالرعد :
- كيف يسرقون هذه الأشياء، كيف ؟
- فتشنا كل حته ، راح فين ؟
- انتم أدرى .
- اطمن ! سعادة اللوا فى الطريق ، ومعاه كرسى لك على حساب الدولة.
- بلغه شكرى، لا أريد شيئاً، ما جئت لأتسول منكم ، عندى ما اشترى به مقعداً ، ولكنى لن أفعل!
تشبث يوسف بحافة المكتب – الذى كان فوقه – ونزل بجسده على أرض الحجرة ، بينما الضابطان قد رفعا أيديهما كل فى مواجهة الآخر، ويوسف ينزل درج القسم ويستقبل هواء الشارع الباكى وهو يصرخ :
- عجزه ! عجزه !

حمدى عبد الرازق

أخى المبدع الكبير حمدي عبد الرازق
مرحبا بك في بيتك و منتداك
حللت أهلا و نزلت سهلا
أحييك أيها الراقي
تنقل لقسم القصة و تشترك بالمسابقة
مع خالص الود

الرائع الكبير حمدي عبد الرازق مرحبا بك في منتداك سيدي تشرفنا وجودك وأعمالك .. دمت كذلك وأتمنى أن تثرينا دائما بأعمالك كما أدعوك لتصفح الأعمال المنشورة بالقسم وإفادتنا برؤيتك

الله يا صديقنا الأديب الرائع .. نعم هم العجزة .
تشريح الفكر الإنسانى من خلال سلوك أصحابه ومشاعرهم وردود أفعالهم هو الطريق إلى معرفة أنفسنا
دمت مبدعًا