مين اللي قالك يا صاحبي

كتب شاعرنا الجنوبي حشمت الصادق قال:

مين اللي قالك يا صاحبي
حجيلك يوم وأعاتب

لو كنت أهل عتاب
كان الضمير عاتب

حسيبك ليوم الحساب
وحتلقى اللي بيعاتب

وتوبة عليا يا صاحبي
ما أدخلك ف يوم عاتب

كام مرة يا صاحبي أسامح
وأمد لك إيدي

وأجيب عليَّهَ الملامة
وأحن يا سيدي

وابذل معاك جهدي
وأقول للإيدين زيدي

وبعد كله يا صاحبي
توقعني ف مقالب

مين اللي قالك يا صاحبي
حجيـــــلك يوم وأعاتـــب

ياما سقيتك يا صاحبي
من الشهد وبْكَفِّي

وتلاقي شهد الكلام
حلو ومْكَفِي

وانت يا صاحبي ف عمرك
ما جيت ف يوم صفي

وتعمل المستحيل
علشان أكون عايب

مين اللي قالك يا صاحبي
حجيـــــلك يوم وأعاتـــب

جراحك ليا يا صاحبي
شرخ ف ضلوعي

وآلامي مني اشتكت
والنني لدموعي

على اللي عشته معاك
وشربت من كوعي

بكره اللي سقيتهولي
يجيك اليوم تكون شارب

مين اللي قالك يا صاحبي .
حجيـــــلك يوم وأعاتـــب

لو كنت تِِعَْْبان
وسنك ع البلا ناوي

ممكن أكون الحنش
وأكون أنا الحاوي

بس شهدي وسِمَكْ
عمره ما يبقى متساويِ

خليك يا صاحبي ف أذاك
ونام ف حضن العقارب

مين اللي قالك يا صاحبي
حجيـــــلك يوم وأعاتـــب

حشمت الصادق

أشكرك أستاذنا الجميل على ثناؤك وسأبلغ شاعرنا الجنوبي ذلك الثناء .. تقبل مودتي

يقول الشاعر الجنوبي حشمت الصادق :
إوعاك يهزك كلام ف يوم عليك اتقال
تملي ابن الأصول عليه الحمول اتقال
وان عاب فيك الرضي خلي اللسان يتقال
هيقول قولاته ولا يصيبك من اللي اتقال