الأب و الأم و البلد العظيم ..

قصيدة ..

الأب و الأم و البلد العظيم ..
( ثلاثية الحب في زمن التراجع )


مفتتح ..

الحب في زمن التراجع
شيء غريب ..
الحب أصله خطوة راسية
تنحني ليها الصعاب
و تقرب الخير للحبيب ..
أما التراجع تنحني بيه الهامات ..
و تقول لحلمك
كش مات ..
ترفع نفوس الكارهين
بالنصر بارليف الرايات ..
فيحس قلب المخلصين بالسحت
في جدار الشتات ..
ما انا قلت لك :
الحب فى زمن التراجع شيء غريب ..
لكنه عايش مش خيال ..
بالحب هانعدى الصعاب
و نغير الليل بالنهار ..
أصل الحقيقة في كلمتين :
الحب في زمن المحال
مش مستحيل ..
*******
الأب ..
( لساك بتحايل في الأوجاع ؟؟!! )


يابو العيون الطيبين
متبسمين ..
مين اللى غرقنى فـ جمايله
بس مين ..
مين اللى فاضت دنيته
مر و حنين ..
شايل على روحه القلق
و جبال تعب
و هموم سنين ..
- لساك بتصرف من يومينك
لاجل ماتحلّي فـ يومينى .. !!!!!!!!!!
لساك بتسعى طول سنينك
و تحوّش الأحلام في حصالة سنيني ..!!!!!!!!!
دايما تكتر من ديونك
لاجل ما تسدد ديوني ..
يابو العيون الطيبين متبسمين
لو أقضى عمري تحت رجلك
مش راح أوفى سداد الدين ..
***
لساك يابو روحى
محنّى إديك ..
بسنين العمر الشقيانة
عمر ما كليت .. ؟؟!!!!
واقف في الشمس السعرانة
بالعرق اللى ما بطّل تنقيط ..
بالشيلة الموشومة فـ كتفك
و اللى مابقدرش أنزلها
عنك في البيت ..
***
لساك بتحايل فى الأوجاع
اللى مابقدرش أتحملها .. ؟؟
و اللقمة اللى ما نزلت جوفك
بتحس بطعمها لما باكلها ..
و بتبقى سعيد ..
فى الموسم أو فـ أيام العيد
بتشيل الهم و أنا فـ بيتي ..
و بتاخد بإيدين أمى و تيجى ..
بقدوم الخير ..
بالبركة اللى ما أحش بيها
إلا و انا معاك ..
بالعزوة الدافية
في حضن أمي ..
و بقولة بنتي
جدو و تيتا ..
قلبي يرفرف فوووووووق
و لا حدش قدي هناك ..
***
لساك بتكلف نفسك بالزيارات ..
مع إنك شبعان أوجاع
بتفكر فيا و أحوالي و تقول:
الواد شبعان أو .. جاع ..
تسلم لي يا غالى أنت و أمي
و دعاكم يفضل م أنسني
من ساعة ما وعيت ع الدنيا ..
و لـ حد مالبّى فـ يوم الداع ..
***
يابو العيون الطيبين
متبسمين ..
مين اللى غرقنى فـ جمايله
بس مين ..

*******

الأم ..
( حكايتي كلها منّك .. )

في البداية
ما ابتديتش ...
لكن أنت اللى ابتديتي ..
البداية هي روحك
نور عيونك ..
لون طريقي اللى اترسم بإدين حبيبتي ..
***
شلتيلى جواكي الحياة
و عملتي من روحك سكن ..
و حملتي روحي شهور
في قلبك ..
اللقمة تاكليها عشانى
الآه تحبيها عشانى
و همومي تشليها عشانى و تقلقي ..
تقلقي لو قل وجعك ..
تبقى حيرانة بمشاعرك
تدعي ربك بالدموع :
إني أرفّص
أتقلب ..
أخبط في جنبك ..
إني أكون عايش بخير
حتى لو أزود في تعبك ..
***
مش عارف أبدأ لك منين ..
مش لاقي حاجة أرد بيها عن جمايلك
يمكن عشان كل الحنين
اللى فـ حياتي جاى منّك ..
يمكن عشان ما اقدرش أبعد
لحظة عنك ..
يمكن عشان
روحي اللى غرقانة فـ شقاها
مالهاش أمان إلا
في حضنك ..
يمكن عشان .. يمكن عشان ..
يمكن عشان أنا كل حاجة فـ عمري حلوة
بالاقيها عندك ..
مهما بابعد و انشغل لازم أجيلك ..
و أما بارجع
و ارمي روحي جوه حضنك
تضحكي لي ..
تسمعي لي ..
و تشليلى هموم حياتي
عن كتافي ..
ترتوي بسمة عيوني
تنتشي صورة كرامتي
تختفي سطوة آلامي


تبقي يا اما شمس عمري
ما انتى أمي
لحمي دمي
كل ما امتلكه فداكي
أصلك انتى
نسيج حكايتى
و البداية من معاكي ..
*******

البلد العظيم ..

الأوله اسمها ..
و التنانية نيلها ..
و التالتة أرضها
و الشعب قنديلها ..
***
الأولة اسمها
الغنوة ساعة عصاري
الحب ساكن في داري
الوحدة مالية قلوبنا
يا مصر حلمي قراري ..
***
و التانية نيلها
أسمر جميل راوي جوفي
عاشق حياتي و حروفي
شهد الحياة ميّته
يا دنيا دوقي و شوفي ..
***
و التالتة أرضها
الطمي خط العمر
و الساقية تحكي الصبر
بالشعب عايشة الفخر
و الثورة كانت فجر ..
***
قومي يا همة بلد
اتباهي بولادك
الرب عنده المدد
و الحق ولّادك ..
خليني أقوم واقف
شامخ كما الأهرام
أمسك زمام حلمي
و ترفرف الأعلام ..

*******



مختتم ..

الساقية دايرة
بتروينا الخطاوى نعيش ..
نحلم ببكرانا اللى جاى ..
أوعاك تصدق
إن الشمس فـ يوم ما تجيش ..
و ليه نشجب في بكره اللى جاي ؟؟؟؟
و بعد الليل ..
هاييجي الفجر ..

*******

مع أطيب تحياتي ..
و تفضلوا بقبول فائق الشكر و جزيل الاحترام ..


الشاعر / أحمد مصطفي معوض

عادل عوض سند كتب:

الاستاذ الشاعر

احمد مصطفى معوض

ثلاثيه تناسبت الكتابه عنها وانتسبت اليها بكل فخر .

الاب والام والبلد العظيمه ..

وقد نالت ثلاثيتك منهم المأرب والغرض .

احييك على بهاء حرفك .

مودتى وتحيتى ...

هذه الكلمات الرقيقة التى قلتموها تنم عن أخلاق مثقف حقيقى
يشجع الكلمة الطيبة و يحث أصحابها على الثبات فى وقت اللا ثبات و اللا مبادئ .. أشكركم جزيل الشكر و أدام الله عليكم أخلاقكم الكريمة و إبداعكم المتميز ..
أحمد ..

حسن الجمال. كتب:

تحية لك ياشاعر بقدر كل هذا الجمال
ابدعت استاذ احمد
كل التحية لك

أشكركم أستاذ حسن ، و أتمنى لكم دوام التوفيق و الإبداع ..
أحمد

الله عليك بجد

استمتعت بكلماتك ومفرداتك وصيغتك للشعر بطريقتك الخاصه

تسلم ايديك يا شاعر

تحياتى

حاجة جميلة جدا

قصيدة بديعة

دام الابداع

دمت بخير

م/عطية شواش كتب:

الله عليك ياشاعر .... أحببت كلماتك ... تحياتي

تثبت بواسطتي

أشكركم و أرجو أن أكون عند حسن فكركم و أدبكم الجم ..
أحمد ..

khaled_dwidar كتب:

الله عليك بجد

استمتعت بكلماتك ومفرداتك وصيغتك للشعر بطريقتك الخاصه

تسلم ايديك يا شاعر

تحياتى

أشكركم جزيل الشكر و يكفينى قراءتكم و ردكم الجميل ..


أحمد ..

أحمد رجب معيط كتب:

حاجة جميلة جدا

قصيدة بديعة

دام الابداع

دمت بخير

أشكركم جزيل الشكر و أتمنى لكم دوام التوفيق ..

أحمد ..

كلمات معبرة عن احلي وانقي حب في الوجود ابي وامي وبلادي تناولت الموضوع بطريقة شيقة وجميلة في وصف مميز في تفاني الاب والام في حب ابنائهم

ايمان محمود خضر كتب:

كلمات معبرة عن احلي وانقي حب في الوجود ابي وامي وبلادي تناولت الموضوع بطريقة شيقة وجميلة في وصف مميز في تفاني الاب والام في حب ابنائهم

أشكر قراءتكم و أتمنى لكم دوام الإبداع و الصحة الغامرة ..
أحمد ..

ما أحلاها من كلمات

بورك قلمك و فكرك و مشاعرك الفياضة


تقبل تحياتي و أمنياتي لك بالمزيد و المزيد من الجمال و الحضور الزاهي

عاطف عبدالعزيز الحناوي كتب:

ما أحلاها من كلمات

بورك قلمك و فكرك و مشاعرك الفياضة


تقبل تحياتي و أمنياتي لك بالمزيد و المزيد من الجمال و الحضور الزاهي

أشكر قراءتكم و تعليقكم الكريم ، و أرجو أن أكون عند حسن فكركم الجميل ..
مع أطيب تحياتى .. أحمد ..

أشكر تعليقاتكم الرائعة المشجعة فى وقت أتمنى أن يكون متقدما أكثر مما يكون متراجعا لنمضى سويا على طريق التميز بمصرنا العظيمة الأبية ..
و كل عام و أنتم بخير ..