مالك حزين كده ياقطر (مشاركة شهر أبريل)

مالك حزين كده ياقطر

بتمشى على سطر وتسيب سطر

خايف من المجهول طب ليه

هو انت طالب غير الستر .



هو انت طالب مليون جنيه

وشقه فوق البيعه عليه

شباكها عالى بقزاز فاميه

وتكون فى عينك زى القصر .

هو انت طالب ياعريس عروسه

مابتشتكيشى من العنوسه

ساكن عنيها بحرين إنوسه

يقولوا فيها شعر ونثر .

هو انت طالب حب وسلام

بعد القطيعه والخصام

صباح يطمن سرب الحمام

على بكره اللى جاى بالنصر .

هو انت طالب فرح وشموع

بعد اما جف نهر الدموع

وشمس غابت عن السطوع

تفرد جناحها فى كل عصر .

هو انت طالب آمان هجر

وأرض بور تطرح شجر

وقلب لين مش حجر

حاجات على سبيل الحصر.

هو انت طالب نقطة نظام

وثوره بيضا ع النظام

سلميه مش تكسير عظام

ويطل بعد العتمه فجر .

هو انت طالب ديمقراطيه

الرأى رأى الأغلبيه

وتموت مذاهب كانت غبيه

كانت بتعصر الناس عصر .

هوانت طالب حبة مطالب

راح يرفضوها ولاد التعالب

راح يقبلوها لو ليك مخالب

لو ليك عنين كما الصقر .

هو انت طالب ايه كمان

يوصلك بر الأمان

فارس نبيل على حصان

بيدافع عن تراب مصر .

أشكرك أستاذي الفاضل

بداية جميلةاخى مصطفى
وننتظر المزيد
دمت بحفظ الرحمن

جميله مصطفى
شاعر الحب
عبدالتواب الرفاعى