مطلوب عريس لمصر

هنوها عالثوره
دي هتستر العوره
بنزف مصر عروس
وان جاتلها الدو؟؟

هنوها هنوها
العاص وكان ابوها
وصىَ عليها فاروق
فعياله خربوها

هنوها باركولها
يصلح بقي حالها
سبع تلاف فرعنه
تلاتين تقندلها

أسلاف وإخوانها
بالغصب وارثنها
وكلاب كتير ودياب
وحاكمها خوانها

باركولنا ياخوانا
سليمان خلاص جالنا
راح يعدل المايله
يصلح قوام حالنا

وان قالوا أصله فلول
مخلب لراس الغول؟
هنعيده ليه تاني
كَنا ف عمل معمول

واما البديل شاطر
معموله ميت خاطر
وجهين لنفس القرش
مش حبه لمخاطر

وان قلنا محروسه
بيدوسوا ميت دوسه
علي قلب خاطرها
عاوزنها موكوسه

يامصر ميت مليون
ليه اللي عوزك دون
معقول مافيش واحد
بايعك وخد عربون؟

عديتي كام نكسه
بين حق ومشاكسه
صابرين نشوف الخير
ولا نشوف وكسه

(طاهر الصوفاني)