يللا نتسلى بلاها غم

ليه العذاب ليه البكا
انا قلبى م البعد اشتكى
ياطبخه من غير مستكه
ياسر قاسى ماينحكى

ليه تكوى قلبى بمكوه نار
وتقول كلام والله عار
وتشكى بس ليل نهار
هو سمارك دا سمار

دانت صحيح بختى الوحش
كلام حقيقى ماهوش بكش
اجى انكشك ما بتتنكش
حبيبى نى ومش حرش

ما تقوم بقى بطل دلع
انا قلبى من جنبى انخلع
كلامك ليه كله بقع
الحق قوام قلبى سقع

غليت لك الصبح اللبن
وسطر عيش ومعاه جبن
وسيجاره لف ومش مكن
وعملت لك قلبى سكن

وانت قالبهالى غم
زهقتنى قوى ياسم
اللى فى وشك دا يبقى دم
بلاش هزار خلاص اتلم

حاشكى لحماتى واقولها
تيجى تربى ابنها
اما كدا تسمع كلامى
واما حاروح واسمها

وليه غم جايبالى فار
يعقدمشاكل يقلبها نار
يقرض كأن مابينا تار
من نونوه لقيته طار

اخص عليك بارد عنيد
لا محوق سم ولا مبيد
ولا من هنا ولا م الصعيد
من بختى انت حبى الوحيد

دا انت ياشيخ راجل هفق
لا يشتى مره ولا برق
وانا اللى خايبه قلبى انسرق
دانت خيال قول كوم ورق