شاهد على مأساتى

وهربت منك وأنا
مش ضامن أرجع تانى
وخدت معايا فى الشنطه
صوره ل ابنى.....
وخدت معايا أحزانى
دموع أمى تودعنى
دعاها أكيد حينفعنى
فى غربه لا يمكن
أنساها ولا تنسانى

ركبت جوه سفينه
وقدام عينى صور
تترائى م الحاضر
وم الماضى
فقلت فى سرى مانيش
أول ولا أخر من يقسى
عليه وطنه......
فكن صابر وكن راضى
سنين الغربه راح تجرى
وحتحوش أكيد قرشين
ساعتها العمر مش
حيعدى ع الفاضى

فجأه سمعت صراخ
سمعت عويل
شعرت بمركبى بتميل
فروحت أستطلع المجهول
لقيت الموج بيبلعنى
ونظرة عينى بتعاتب وبتقول
......... بقى معقول
بسهوله ياوطنى نموت
كان نفسى أعودلك تانى
ولوجثه فى قلب تابوت
كان نفسى فى متر
يضم عظامى ورفاتى
يكون شاهد على مأساتى
لاكن الملح كفنى
وقاع البحر كان قبرى
وكان متوايا......
ماعتشى قادر ياوطن
أرجوك كفايه

نص جميل اخى سامى
تحياتى لك

نص رائع حقا
دام الابداع
تقبل مروري

الأخ رافت شكرا على المرور الكريم

الأستاذ عادل شكرا على المرور

الأستاذ أحمد شكرا على المرور