مين مع مين للشاعر ماجد كمال أبادير

كل شهر وانتم بكل الخير.. اشارك في المسابقة بهذه القصيدة

مين مع مين ؟؟

للشاعر : ماجد كمال أبادير
مين ..مع مين ..ومين علي مين
وفين احنا ..ورايحين فين
ده حلم سنين ..بقاله ايدين
مع رجلين ..بقي يمشي
وعلي حيله وقف منصوب
ما عدش كلام نقوله لبعض
ولا متداري ف قصيده
وبرضك لسة مش شايفين
ولا عارفين ..مين مع مين ..
ومين علي مين
وفين احنا ..ورايحيين فين
وبنقسمها بالحتة
بدال الحزب .. بقوا ستة
ده بعد 200
وليه ومالوش
وجاي بارش علي الفتة
ولسة الفتنة هياها
بقت كوباء بيتسرسب...ف ميت حتة
وناس جرانا للمجهول
وناس جاهلة .. وحزب فلول
ولسانا بنفطر فول ..وبنفلس في يوم ستة
وناس فاكراها بالجتة ..وناس لابساها كرافتة
ولا استثمار...ولا شفتش لشبر عمار
واسعار نار..ومش لاقيين
ولا عارفين
مين مع مين ..ومين علي مين
وفين احنا ..وفين رايحيين
وناس طالعة بتتكلم كلام أهبل
وناس عارفة وبتستهبل
واعلام سقف علي تطبيل
وشابعين البقر تهليل
وبالمصحف وبالانجيل
لو انحرف اتجاهنا شمال
ماهنشوفشي ف حياتنا يمين
ولا هنعرفشي حتي ف يوم
مين مع مين ومين علي مين
وفين احنا .. وفين رايحيين
وناس باعوا وجم شاريين
وناس شبعت وناس جعانين
وناس عايزنها للاخر
وناس عاجزة بتتاخر
وم الاخر ..بالف لسان بنتكلم
ولا شوفتش ودان سامعين
وادينا خلاص علي ابواب انتخاب داخلين
ولاعارفين
لا مين مع مين ..ومين علي مين
وفين احنا وفين رايحيين