طلع النهار قصيدة للشاعر كرم فصاد

[center]المنتدى : ::: شعـر العامية :::
افتراضي طلع النهار قصيدة للشاعر كرم فصاد

طلع النهار

شعر : كرم فصاد

يا مصــــــر ضى نهـــارك بان

قومى افتحيـله الباب والشيش

دا شـبـابـنـا غـنى ف كل مكان

والكـل ردد قـالـه تـعـيــــــــش

مـدى الغـنــــــاوى يا طـراحـة

خـلـيـــــــنـا نحـلـم بـصــراحـة

من النهـاردة مافـيـــش راحـة

واللى اتولد ف النور حيعـيـش

? ? ?

بإيـديـنـا هـديـنـا الأســـــــــوار

وم الضــلام طـلـعـنـا نـهــــــار

يا مصـــــر أرضـــــــــك ولادة

وكل يـــوم حـتـجـيــب أحـــرار

لـمـى القـلوب المـوجــــــوعـة

وضـمـى صـوت المـجـمـوعـة

الكـلـمـة تـصـبـح مسـمــوعـة

وف أى شــدة ماتـتـهـزيـــش

? ? ?

يا صابرة خـدنا اللى باقيـــلك

من إيد لصوص للنيل والطين

دول مش طيور عاشقين نيلك

دول ناس لا ليها ضمير ولا دين

قاسين على تراب بيشيـــــلهم

وتـرابـهـم اتـبـرأ منـــــــــــهم

ولو نـطـق كان عـفـــــــــرهـم

وقال ماشيلش قلوب خفافيش

? ? ?

يا بلدى غـنى ف كل ميـــدان

ولو نـزل دمعـــــــــــــك غـنى

صورة شهيــــدك نور وإيمان

ف كل وقـت بـيـحـضـــــنى

من فوق حـبـال الفجـر بادور

وباشـد ضحـك حـروف النور

لطريـق لـقـــــــــــاك بحـريـة

طريق مافهش هامان بشاويش

? ? ?

خـلـيـنى أهرب لميــــــــدانى

من جـرح قـلبى الجـــــــوانى

نغـزل عذاب ثورتـــنــا ورود

لكل من جـرحـه يـعـــــــــانى

دا الشــعــب روح بتكلم روح

وقلب حاسس بالمجــــــروح

مش نبض حس رخيص وهزيل

يمص خـيـــــــرك ولايديـش

? ? ?

سقـيـت ترابــــــــك من دمـى

وفضلت على أرضـك أسـمـى

ومشيت غريب خـايف منـــك

وساعات باشـك إنــــــك أمى

باجـر قـدمى وبـتـقــــــــــوى

وشــراعى مش قــد النـــــوة

يـا حــوا م الجـــــوع بـتـلوى

واللقـمــة فـيــك مابتكفـيـش

? ? ?

حلمـنا بالحـرية سـنـيــــــــن

وكان علـيـنـا الكون بيضيـق

وكنا ف الأحـــــزان عايميـن

غـريـق يمد الإيـــــد لغـريـق

مافيـش لا ساحـل ولا ميـنـا

ولا حــد بـيـبـص عـلـيـــــنـا

وطلعـنـا فارديـن خـطـاويـنـا

والشعب شاف الموت ماجريش

? ? ?

بالصمت عشنا ف ليل وهموم

مافيش أمان ولا طاقة نـــــور

على الآلام بـنـــــــــام ونـقـوم

والظلم فـيــك طلع له جــــدور

صـبـرت ع الظـلـم لـيـــــــالى

والثـــــــــــورة والدم الغــالى

خـلـوا لحـقـك صــــوت عالى

وسمعه ناس مابيسمعوكيــش

? ? ?

يا مصرى صور سحر الكون

لناس كتير مالهمش عيـــون

وقول يارب اجـعـلـنى أكــون

عبير نغم دايما بـيـفــــــــوح

م الكـل زى مافــــــاح مـنـى

إملا التاريـخ حـكـمـة وإلهام

وخـلـى ف اللـمـة فـضـيـــلة

تـقـوى صـبـرك ع الأيــــــام

وتـخـلى أحـلامـنـا نـبـيــــلة

ومن النهـاردة ف كل مكـان

الشعـب واحـد ويـا الجـيـش

? ? ?

أحـلامـنـا ما بقـتـش بعـيـــــدة

ودخــلـنــا على دنـيــا جـديـدة

بقلوب شباب عرفـوا الإصرار

ونفـوس على الأرض شهيـد

لا يـوم حـنـسـكـت ونـســـامح

ولا حــد حـيـعـيـــــد إمـبــارح

حـنـركـب الـنـصــــر الجـامـح

ونـفـرد الجـنـاحـات ونـعـيـش

شعر : كرم فصاد

شاعر غنائى مولود 16/4/1967م .
صحفى و شاعـر غنائى
عضو اتحاد كتاب مصر عضو جمعية أنصار التمثيل والسينما.
عضو جمعية الأدباء بالقاهرة.
صدر له العديد من الدواوين

التوقيع

علاء أبو خلعه
مرسى مطروح
نقره لعرض الصورة في صفحة مستقلة

اولا يا استاذ كرم احب
ارحب بحضرتك فى منتداك
ثانيا يا استاذنا
حابب اقولك تسلم ايدك
زجلية جميلة جدا
يا فنان
دمت اخى الغالى فى خير حال
Very Happy

الشاعر الراقى علاء أبو خلعه

أهلا ومرحبا بك فى بيتك ومنتداك

وأهلابك بين أخوتك ونخبه رائعه من كبار الشعراء

وأهلا بقصيدة الشاعر الكبير كرم فصاد

وشكرا لك لنقلها الينا حيث الابداع الثورى الراقى

دمت بحب

الاستاذ علاء ابو خلعه

عرفتنا بشاعر اكثر من رائع .

وعنده الموهبه كامله متكامله . وشاعر قوى ورائع .

شكراّ لنشر تلك الرائعه لهذا الشاعر الفلته .

مودتى وتحيتى ...

» عدد عمري "قصيدة " للشاعر سيد البالوي
» قصيدة علم العروض للشاعر سيد البالوي
» قصيدة "طار الحمام" للشاعر سيد البالوي
» قصيدة ( من ....) للشاعر خالد قاسم
» مليون قصيدة "للشاعر سيد البالوي