ولسـّه عايزه تفهمي ..؟ .. وتهنئه قلبيه من ضياء الدين البري

السلام عليكم .. مجرد رأي
كلام من قلبي

كل عيد وكل الأحبه أعضاء المنتدي الرائع بخير
وأهنيء الجميع بعيد الفطر المبارك
أعاده الله علينا جميعا بالخير والبركه
.....

ولسـّه عايزه تفهمي ..؟

.........

الحلم ضاع..؟
واللا انتي لسه بتحلمي ..؟
غيط السنابل
لو يرتوي ، يطرح أمل
جراحه ممكن تلتئم
عيونه ترجع تترسم
ولسّـه عايزه تفهمي ..؟
طب حاولي يمكن تقدري
علي نبض إبنك دوّري
جايز تلاقي شبْـه ضي
بصي فْ عنيه ، تلقي الهمم
دايره تعاديه
روحي اندهيه ، يمكن يكون
ع الشط مالحقش الغرق
ساكن في حلمه اللي اتشنق
وسط الغلابه
صاحبوا السكوت ، جوّاه ملل
جذوع شجر
تطرح طيابه
سر الحياه ، في صبرهم
الجوع بيضرب ع الدفوف
لحن الوفا
حر العطش ، بيزيد دفا
مرسوم علي بطونهم تابوت
أو شبه صوره ع الجدار
باقي الكلام ، باين خطوط
ودموع تلالي وتبتسم
ونجوم بتهرب جوّا ليل
الفقر طاوي الدنيا طي
مسعور وناوي يلمـّهم
لكن صمود الصبر حيْ
يكوي قلوب الشرْ كيْ
اللي بتاجروا في الضياع
عاملين ديابه
شيء من زمان
زارعين عقارب سُمّهم
جوّا الميدان
وكتير ضحايا لحلمهم
بيقولوا عنهم دول رعاع
إكمنهم
عايشين يخافوا ربهم
وفْ حبهم ، مالهومش زي
دايما يصونوا أمّـهم

ولسّـه عايزه تفهمي ..؟
طب دوَّري
لو تقدري
يمكن تشوفي الطير طشاش
يحلم وحلمه طار مجاش
ريشه اتنتف ، عملوه بخور
جوّا القفص ، حر وطليق
مايهمه ليل ، أوحتي ريح
يمكن في بكره
يلمح شعاع
أو شبه نور ، يعلن نهار
طافش سنين ، راقد في غار
والليل حزين
شايف أحبّـه مظلومين
الدنيا قاسيه وغرّبتهم
داقت عليهم في المطارح
وكتير جوارح
جوَّعتهم
سممتهم
والضَّحيه كان فقير

ولسّـه عايزه تفهمي ..؟
دوَّري
لو تقدري
بين الحياري
عايشين سكاري
برّا الحواري والكهوف
طول عمرهم ، ماعرفوا خوف
بس جوَّاهم حزين
داخل نفوسهم مسجونين
إمته هايجي النور وفين ..؟
الصبر حداهم ، شيء مألوف
مهما كان القلب أسير

ولسّـه عايزه تفهمي ..؟
دوَّري
لوتقدري
تحت أطلال الضلال
وسط الصحاري
أو في البراري
أو في وديان الجبال
فعل ماضي أو مضارع
بالأمر تلقي الحي مات
تحت الحَجَـر
كتير بشر
عايشين رفات
تحت أكوام الحياه
دبحها ناب ، .... انسعر
أصل الزمان ، عاجز ضرير

ولسّـه عايزه تفهمي ..؟
دوَّري
لو تقدري
يمكن أكون
عنوان وتاه من غير دليل
يمكن خيال
أو شيء محال
يمكن شوية م القليل
أو أنِّـةْ ساكنه جوّا ليل
أو آه بتزعق في السكون
أو دمعة تايهه فْ عين صبيه
متلتـّمه
متيتـّمه
ساكنه العيون
عشان ضحيه
بين الجفون
عايشه الأمل
من غير مصير

ولسّـه عايزه تفهمي ..؟
دوّري
لو تقدري
قولي يارب
مدّي إديكي وابدري
حبة تقاوي
مسيرها يوم
تطرح حكاوي
من بين حروفها يتولد قارب نجاه
يقدر يجدف مره تانيه في الحياه
يرجع تاني الحب يطوف
جوّا قلوبنا
وفْ دنيتنا
نخاف أخرتنا ، أكيد بضمير

.....

أشكركم
وللجميع تحياتي

أخي ضياء
شكرا للقصيدة الجميلة
- مجرد رأى منى أنها جميلة و غير ملزم للأخوة الأعزاء -
هههههههههه
كل عام و انت في تمام الصحة و العافية
و من جميل إلى أجمل أيها الشاعر الشاعر
خالص ودي و تقديري

الاخ الحبيب الشاعر

ضياء الدين البرى

قصيده جميله وهذا ما عهدناه عليك

الموضوع جيد ومفرداتك كالبصمه لا تتكرر

كل سنه وانت طيب .

وتقبل منى كل التحية والتقدير ...

الشاعر الجميل
ضياء الدين البرى
بجد احلا قصيدة
فكرة كانت بعيدة
عن الشعراء وجديدة
كل عام انت بخير يا استاذ ضياء
وعيد سعيد
تيمو

معاني عميقة لا يشعر بها الا شاعر يشعر بمعاناة الواقع الأليم ولا يستطيع تصويرها الا قلم الشاعر
ضياء الدين البري
دمت بكل خير أيها القدير

الاستاذ ضياء الدين البرى

انها الرومانسية

والجمال والجلال

تحياتى

الله عليك بجد

فعلا مفردات جديده ومعانى جميله

ورومانسيه رائعه مع وطنيه حالمه

تحيتى لجمال حرفك

دمت بحب

ماحوظه

تثبت القصيده بواسطتى

لروعة الحرف

ولسّـه عايزه تفهمي ..؟
طب دوَّري
لو تقدري
يمكن تشوفي الطير طشاش
يحلم وحلمه طار مجاش
ريشه اتنتف ، عملوه بخور
جوّا القفص ، حر وطليق
مايهمه ليل ، أوحتي ريح
يمكن في بكره
يلمح شعاع
أو شبه نور ، يعلن نهار
طافش سنين ، راقد في غار
والليل حزين
شايف أحبّـه مظلومين
الدنيا قاسيه وغرّبتهم
داقت عليهم في المطارح
وكتير جوارح
جوَّعتهم
سممتهم
والضَّحيه كان فقير

****

الاستاذ الشاعر القديرضياء الدين بري

انتم شكلكم فاهمين الست دي غلط

والله دي فاهمه وواعيه وعارفه كل شئ

هيا يااما مطنشه يااما بتستعبط

يااما زهقت بقي مننا ومن المحايله عليها

دي مش هتيجي غير بالعافيه؟

تحياتي لحضرتك ولكل حرف من قصيدتك الرائعة

» ولسـّه عايزه تفهمي ..؟ .. ضياء الدين البري
» من غير دليل .. ضياء الدين البري
» ولسّـه عايزه تفهمي .؟ ضياء الدين البري
» ولسّه عايزه تفهمي ..؟ مرة أخري .. ضياء الدين البري
» مـش بــإيدي .. ضياء الدين البري