للذى لن أنساه ..

كنا بنقسم ضى الحلم

عمر القلب ما شد رحاله إلا لحبك ..
بسمة وشك دايما تفتح كل طريق
كان الشعر بيبدر كل فنونه ..
فيطرح شمس القول فى قصايدك ..
****
يااااه ..
فاكر لما بنينا قصديتين
بيت ورا بيت ..
و عزمنا لأول مرة
نروح ندوات ..
****
و النقد علينا زى المطرة
الناقد من دول ..
بقى بيحدف ببحور الشعر
حركات و اوتاد ..
و احنا ساعتها
لا كنا عرفنا النقد الهدام م البناء ..
لكن ..
من حب عنينا
فـ روح الشعر صبرنا
و اتعلمنا نقول ..
****
و انت ساعتها
قلت بحكمة قلبك
هانقول ..
و اللى هجانا اليوم
بكره هايشكر فينا
و هايدعينا عنده ضيوف ..
*****
و مشينا طريقنا بجد
عمر الشعر ما كان جوانا هزار ..
*****
بقى أى كتاب يتمسى معانا
يصبح مقرى ..
عمر الوقت ما ضيعناه
إما فى ندوة أو فى المعهد أو فى إدينا كتاب ..
*****
كانت تشجينا الأشعار
و تأثر فينا " العبرات "
و كلام " الفاطمة " لما تقول " لحراجى القط ":
"ما طول قلبك .. لا قطع بسنانى الحتة القاسية فيه "
و نعيش مع" تغريبة عب رزاق" و"الصابحة "
الماسكة فى إيدها "الواد حسان"
و التوهة فى غربة "عبد العال" ..
يااااااااه
حكيات عشناها كتير مع بعض ..
*****
و مشينا السكة الصعبة بحب ..
عمر ما أثر فينا الجوع
أو تعب الرجلين م المشاوير ..
و لا كتر مناهدة على فيلمك"مسعود اللالى"
مع نجم ممثل .. أو صاحب شركة إنتاج
يوووووووووه .. لفينا كتير ..
******
كنت تشيل الهم فى قلبك
و تخبى عليا عشان مازعلش ..
و تقول لى بكره هاتتعدل
طول ما بنسعى
الصعب هايصبح سهل ..
*****
عمر الفرقة ما وقفت بينا ..
كنا اتنين فى الشكل
و واحد فى المضمون
توأم روح ..
و لو انك أحسن منى يا صاحبى
فى هدوء الفكر و فى المجهود ..
*****
عمر لسانك ما اتخطى حدود
دايما بينقط شهد
و قلبك بحر كبيييييير
شايل كل هموم الناس ..
*****
كنا بنقسم ضى الحلم
ونحلم يبقى الشعر حياتنا
و شمس الحلم بقت ندوات ..
نتآنس بقصايد حبايبنا من الشعراء
بمحمد عباس محفوظ و بجابر و الديب
و الجندى و كل الشعرا المحترمين ..
*****
يا سلااااااااااام
عمرى ما حسيت بالوحدة معاك ..
و اتعلمت
أحب وجودى بين الناس ..
حبيت ندواتك .. حركاتك .. أفكارك ..
البسمة الونسة
الحب الفواح فى كلامك
الخطوة المقسومة ما بينا
اللقمة اللى نشيلها لبعضينا
السكة المليانة طموح ..
*****
كنا بنقسم ضى الحلم ..
نحلم نحلم نحلم
و نقوم للواقع أقوى كتير مع بعض ..
*****
و فـ يوم
كان الحلم سلام ..
شديت على إيدك
- مش سايبك رايح فين ؟؟؟؟
سيبتنى و مشيت ..
قمت من النوم
خير اللهم اجعله خير ..
بصيت بعيونى
لقيت اللقمة صحيحة بحالها
مش مقسومة ..
و لقيت السكة طويلة و صعبة
و الخطوة تقيلة تقيلة تقيلة
قلت يا صاحبى ..
ده احنا بنقسم ضى الحلم
فجأة لقيتنى لوحدى
فـ دنيا عريضة و صحرا و شمس ..
فين الضل !!
فين الضل فـ بسمة وشك ؟؟؟
ففهمت ساعتها
بإن القلب الطيب فاتنى و راح ..
من حرقة قلبى بكيت و حزنت
ع الحب البركان جوايا خلاص
صليت و دفنت ..
و حبست النفس
بين جدران الأوضة الضلمة
ساعات و ايام ..
*****
و أما ميعاد الندوة حضرنى فقمت ..
و لبست الهدمة مشيت
من نفس طريقنا و رحت ..
رحت لصاحبى الندوة باسمه ..
رحت اناديه و أدعيله و أقوله
مش هانساك ..
و لحد ما نتقابل تانى ..
عمرى ما هانسى
البسمة الونسة
الحب الفواح فى كلامك
الخطوة المقسومة ما بينا
اللقمة اللى نشيلها لبعضينا
السكة المليانة طموح ..
*****
مهما بعدت يا صاحبى هانفضل
نقسم ضى الحلم ..
*****
" مرثية لروحي الهائمة بلا مرسى عسى أن تهون على شق قلبي الحزين الذي فقد شقه السعيد : الشاعر الإنسان / خالد عبد العزيز لاقتراب ذكرى وفاته الثانية رحمه الله .. "




أحمد مصطفى معوض

الف رحمه ونور على الشاعر خالد عبد العزيز
رحمه الله وادخاله فسيح جنته
رثاء من القلب للقلب ما اجمل الصداقه وما اجمل الوفاء فيها
اسال الله ان يلهمك الصبر كم كان رثاءك جميل
كلمات مؤثره للغايه قوللك السكه طويله وصعبه والخطوه تقيله تقيله
فجاءة لقيتنى لوحدى
سرد الاحداث وتتدرجها اعجبنى جدا
جميل ما قدمت شاعرنا احمد مصطفى معوض

الشاعر أحمد مصطفى عوض
دمت مبدعا وفيا
قصيدتك نابضة بالحب والوفاء
تقبل مروري وتحيتي ومودتي

ياااااااااااه قطعت القلب يا واد

وعرفت بأنه اجمل شاب

رجّعت الذكرى لخالد

الذكرى الخالدة بنور وعذاب

وعتاب للزمن الواخد احلى شباب

خالد؟ مين دا اللى شافوه

من اول مرة خالد حبوه

ولقوه ..الاصل صعيدى يابوى

فى عينيه حبات عالضى تبات

وكلامه شعر ينز على العتبات

والروح هربانه مخبرش لفين

على طول بيبص لقدامه بشوقين

لعياله وامه بدمعة عين

فى الجنة اكيد ومع الخالدين

فى الجنةاكيد ومع الخالدين

ابنى الشاعر الوفى الجميل احمد مصطفى معوض

تعيش وتفتكر يابنى اجمل انسان

فاكر لما ناقش لى ديوان التوب الضيق فى البوهى؟

يااااسلام قبلها قابلته فى الفنانين العمال وكان بيقدم المهرجان

لكل سنه ولكل الشعرا وقاللى لازم تزورينا فى البوهى يا استاذه

انا محتفظة بصورته وهو عالمنصة وبيقدمنى للجمهور 2006 تقريباً

ربنا يجعل متواه الجنة آمين

كتبت هذة الابيات ارتجالى وسريعة الآن ودى اقل شئ للمرحوم خالد عبدالعزيز

دمت ودام وفاؤك يا احمد

الله يرحمه
انا لا اعرفه
و لكن جميلة لمسة الوفاء من الأصدقاء و الأحبة
و جميل ان تكون سيرة الانسان بعد موته عطرة
فعلا الانسان سيرة
اللهم اجعل مثواه الجنة

حنان ابراهيم حافظ كتب:

الله يرحمه
انا لا اعرفه
و لكن جميلة لمسة الوفاء من الأصدقاء و الأحبة
و جميل ان تكون سيرة الانسان بعد موته عطرة
فعلا الانسان سيرة
اللهم اجعل مثواه الجنة

شاكر جدا لمرورك ومشاركتك الفعالة ..
و دام الله للمبدعين التوفيق و الإبداع ..
أطيب تحياتى .. أحمد