][ :: رُباعيات :: ][

تـايه بــدور جوه مني مـعرفش ليه شــارد
والـحُزن عـشش جوه قلبي وع الجبين فارد
قولت أما أدور ع الفانوس السحـري يمكن
أدعك فــانوس الفرح يطلع منه مارد
وعـجبي !!

---

الظُلم ممكن يبقى قاضي فـ محكمة
في السجن تلقى اللي إتظلم وحده إترمى
وأنا ليه أبين شكوتي للناس ما فيه
عدل أشتكيله همي فوق رب السما
وعجبي !!

---

عيش الحياة وإقفل بيبان الحُزن والماضي
إياك تعوم يوم عكس موج حتى ولو هادي
وإنسى فـي همك إوعى ترضى فـ لحظة بيه
لو ترضى بالهم فـي يوم ما يبقى بيك راضي
وعجبي !!

---

يا هلترى مُمكن يكون الحُزن مُش عادة
ولا عيوني بالدموع هتضل ولاّدة
دا الدُنيا دي زي ما تشرب مـرة قهوة
أيام بتبقى مسكرة وأيام تكون سادة
وعجبي !!

---

واحد بيسألني دا فين ألقى الدفا
الحُب لسـا في دُنيتي ولا أختفى
قُلت أسأله يا هلترى ولعت شمعة
وفـ تاني يوم ما صادفت نورها اللي إنطفى
وعـجبي !!

---

إحترت فـ الناس اللي يـوم تقبل تبات ظالمة
وإحترت م اللي بيتسجن بس عشان كـلمة
جرب فـ مرة تِعمي عينك ع الحقيقة
وهيجـي يوم من وحدتك تلعن أبو الـضلمة
وعجبي !!

---

قصقص جناح الحلم من يأسك
وألعن حظوظ الدنيا من نفسك
إسأل عن الليل الغميق إيه طوّله
تلقى شيطان الحيرة دا لابسك
وعجبي !!

---

تايه في ترســـــــانة الحياة
مُش لاقــــــــي أي طوق نجاة
شـايف في ناس بتموت من الوحدة وهُما
لو حد منهم ع الحُب دور كان لقاه
وعجبي !!

---

مات الحيا فيـنا إندفن
والإحترام فوق الكفن
أخلاقنا كـات ثمرة جميلة
دلوقتي ليه صابها العفن
وعجبي !!

---


دقت قلوب النـاس وإديني في وسطهم
شقشق نهـاري وشمسي بايته في حُضنهم
هل الهلال عمال ينادي ع النجوم
وسط الســما بيبوس خدودهم كُلهُم
وعجبي !!

---

مُمكن يكون الحلم ميت وإنــــــــدبح
مُمكن يكون القلب خزيــــــان وإنجرح
حاول وماتبينــش يأسـك للحيـــــــاة
مُمكن يعشش جوه منك للأمل ألفين شبح
وعـجبي !!

---

الحلم مُمكن ترسمه فــ حــــبـــــة ورق
والأمل مُمكن يكون ع الخد نقطة من العرق
كُل اللي تقدر تعمله يــــــــــالا أعمله
ماشوفنا حلم بالعمل مرة إتشــــــنق
وعـجبي !!

---

إفتح قـلوب العـاشقين تلقاني أنا فيـــهم
كاتب فـ أبيات الغرام بعـزف فـ أغانيهم
لـو مرة بتغيب شمسي أنا يـوم عنُـــهم
تلقانـي وقت الليل قـمر نــور خـطاويهم
وعـجبي !!

---

لو كنت ف الدُنيادي مش قادر تعيش
لو كنت مش عارف وردك كان مافيش
دور ف نفسك ع الطريق الصح وإمشي
وإفتح لقلبك ع الحياة مية ألف شيش
وعـجبي !!

---

الدمعة ممكن تتولد جوه العيـــــون
والضحكة أول خطوة في دروب الجنــون
ودا مش مهم إن كنت ح أضحك ولا أبكي
بس المهم أنا ليه هنا ولفين هكـــون
وعـجبي !!

---

فيه قلوب تعيش وقلوب تموت وقلوب تكون حايره
ما بين لُقا وما بين فُراق بين البينين دايرة
فيه قلب مُمكن تجرحه من غير كلام
وقلوب ألمها بتولدة نسمة هوا طايرة
وعجبي !!

---

الدُنيا مش تعويذة مكتوبة في كتاب
ولا هي فاتحه ع الخلود كام ألف باب
الدُنيا فانية زي ما أنت يا صاحبي فاني
هتموت وبرضو هتندفن تحت التُراب
وعجبي !!

---

حُزني وحُزنك جوه عين الــكون دمـــوع
فرحي وفرحك فـي القلوب بيسد جوع
واليأس سكة طويلة بتموت أمـــل
والــجرح رحلة من الألم مفــيهـاش رجـوع
وعـجبي !!

---

إرمي تُكالك ع الكريم هو اللي بيك عــالم
وإروي مشاعرك بالإيمان تلقى الطريق سالم
وأطرُد شيطان اليأس دا من جنتك
عُمرك فـ يوم شوفت الرحيم ظالم ؟!
وعجبي !!

---

الكـون دا م الأول أساسه من الفـضا
والحـلم مُمكن يبقى مليان بالصدا
لكن إيمـانك أقوى من كُل الظروف
زّوِد إيــمانك تلقى أحلامك قضا
وعـجبي !!

---

مهزوم يا قلبي فـ الغرام ياما أتصدمت
وفـ دُنيتي ياما أنكسرت أنا وإنظلمت
بنده يا قلبي إنت عايش ولا مـيت
ملقتش رد خِلص السؤال بدقيقة صمت
وعجبي !!

---

الليل في جوف الشمس بيّت وإتعصر
صبح الصباح والديك بيدن وإنحصر
موج الظلام على شط يومي اللي إنتهى
مد الفرح على جزر أحزاني إنتصر
وعجبي !!

---

فـي العشق قلبي دا إغتوى ومقالشي لأ
من سحرها قلبي إنكوى كان عنده حق
لا فـ يوم بيقدر ينكر إنه حـبها
مصر إسمها قُلت أنطقه فلقيته دق
وعجبي !!

---

نزل المطر يِغسل ذنوب أهل البشـر قولنا السما باكية
يا قُدس ضُمي حِلمنا مُش زي أنطاكية
قلبي الحجر قام فتتُه حبة مـطر
وقلوب كتيرة إتحجرت بالدمع مُش شاكية
وعجبي !!