بحر التوهه

تحياتى لهذا القسم العامى الملىء بالعمالقه واننى مهما كتبت لا أصل نقطه فى بحر ابداعهم الرائع والراقى
هذه القصيده ارتجال بسيط من وحى قصيده أنا الزهره اللى مات عودى للشاعر أحمد موسى


وأنا داير فى عتمه المشاوير
الاقى مرايتى تندهلى
وفى عز الضلمه تفتحلى
مكان من جوه أحلامها
أشوف الصوره على مهلى

الاقى ايديها وخدانى
تقولى شوفى من تانى
فى لحظه الدمعه تتسرسب
وتملى كل شطئانى

فى بحر التوهه لقيت نفسى
بعيد والدنيا نسيانى
بعافر بس من نفسى
أشوف من تانى أيامى

وأحلامى تقولى إرجع
وبركانى ما راح يخضع
أمد الأيد بعلو الصوت
وقعت فى توهه مابتسمع

وأدور تانى على نفسى

الاقى ضحكه مصنوعه
وكلمه منى مخدوعه
بتنطق فى الوجود كله
وترجع ليا مردوده

وعمرى طفل وبيحبى
فى أخر الصوره راح يحكى
عن الحلم اللى فوق عالى
وقع من قبل ما يشكى

وحبى غنوه غنتها
لقيت الغنوه موجوعه
ومن قلبى أنا أدتها
وقمرى تاه مع التوهه

ياريتنى كنت أنا منك
وعنك شيلت أنا همك
ولا أكونلك فى يوم دمعه
وماتت قبل ما تضمك

ماهى دايره وبتدور
وأنا جه عليا الدور
أكونلك ذكرى منسيه
تتوه ويا السطور

المبدعة الأخت العزيزة الغالية صدفة قصيدة رائعة أحيكي عليها ، دمتي بكل خير و دام قلمك مبدعا لنا و تقبلى مرورى و تحياتي

الله عليكى يافنانه جميله جدا تحياتى

أستاذى الكبير :عادل عوض سند
أسعدنى جدا مرورك على صفحتى المتواضعه
قفشتنى أنا بس أجى جمبك ايه ولا جمب عمالقه العاميه أيه
فأنا عابر سبيل على باب شعرك يا أستاذى الكبير
أنا قولت بس أتعلم منكم يمكن أنفع

شاعرتى المتوجه على عرش قلبى:عزه الزرقانى
أنا فى منتهى السعاده لمرورك فى صفحتى وبتشجيعك لى دائما
انا قدام شعرك ولا حاجه
وفى الاصل منتيش محتاجه
رقتك فاقت كل وصف
بس قولت يمكن يطلع حاجه
ولا أخافش تانى من حاجه

تحياتى

يا احمد دأنت صاحب الالهام وخلتنى اغامر واكتب عامى
يبقى بلاش تواضع يا شاعر يا كبير
وربنا يبعد عنك الحزن دائما يا أحمد
مستنياك دائما فى صفحاتى

ألأستاذ العندليب : العندليب الاسمر
أسعدنى مرورك جدا ومعلش دى ارتجاله سريعه انا نزلتها من غير مراجعه عشان عاوزه اتعلم منك بجد
تحياتى لك

أستاذى القدوه دائما:عاطف الجندى
يا جندى ما انت الخّيال
خلتنى بعذف الموال
ولعيونك أقول الشعر
ويرجعلى يقولى ده محال
أكون جمبك أنا بس إيه
دأنت الباشا و أنت البيه
والشعر جمبك يتمخطر
دأنا بتعلم ألف بيه

أسعدنى مرورك جدا أستاذى وتشجيعك ليا دائما رغم الكسور فى قصيدتى لكن أبرده بتعلم وهتعلم

ميره الجميله أميرة قلبى :أميره البدرى
وحشتنى يا قمر وبجد نفسى أشوفك
دايما كده بتشجعينى بكلامك الجميل رغم إنك الأستاذه وأنا التلميذه
بس بستناك دايما فى صفحاتى

القاص الأديب المبدع :شريف العجوز
أسعدنى مرورك جدا رغم أنك قاص فإنك متذوق جيدا للشعر
ويهمنى وجودك فى صفحاتى دائما
تقبل تحياتى

شاعرنا الجميل :سامح الكومى
أسعدنى مرورك فى صفحتى المتواضعه جدا أمام شعرك المتميز دائما
بس انا عارفه إنك بتشجعنى
هستناك دايما
تقبل تحياتى

حبيبتى الاميره
مرورك على صفحاتى دائما يعطى البهجه والسرور لصفحات حياتى
تقبلى تحياتى

سلسبيل الشاعره الواعده جدا
ارد عليك اقول ايه فى وسط جمالك ده كله
انتى هتقعدينا فى بيوتنا بعد كده
انا عارفه انى كنتى عاوزه منى فى الرد شعر ارتجالى بس انتى اكتر واحده عارفه انى تعبانه جدا وقاعده على الجهاز بالعافيه
ان شاء الله هرد عليك فى اشعارك القادمه
هتوحشينى يا صديقتى العزيزه

أستاذتى الغاليه الكبيره : وداد الهوارى
انتى عارفه بحب العامى جدا بس مبكتبهوش ولما اكتب عامى تشجعينى اوى كده دى حاجه كبيييييييييييييره اوى بالنسبه ليا
هقولك سر انا بدأت أحب العامى بجد من ساعة ما سمعته منك فى الجامعه الله عليك وعلى رقتك وقوتك فى نفس الوقت وانت بتلقى اشعارك
ان شاء الله المره الجايه اكون عند حسن ظنك اكتر واكتر وتشجعينى كمان وكمان

الشاعر المتألق: عمرو زيتون
دخولك فى صفحتى خلانى احس بسعاده حقيقيه لكون شاعر فى تألقك يمر عليها بس انا عارفه ان ده تشجيع كبير اوى عليا
القصيده ارتجاليه وانا عارفه ان فيها اخطاء فى الوزن بس رفعتها عشان اتعلم منكم اكتر ومصححتش فيها حاجه
ان شاء الله اكون عند حسن ظنكم جميعا المره القادمه
اتمنى ان اراك دائما فى صفحاتى