أربع جهات ع البحر

عمرك فضفت معاه
ورميت سرك جواه
فانطلق الحلم في قلب الروح
والموج في عيونك حس الآه
فانتفض السر وباح بهواه
البحر اياه
بيرفرف في الملكوت لمداه
الله الله الله الله
تعرف تقراه
وجهاتك الاربعه يحتلوه
ويفضفضوا ليه
يتمشوا معاه
البحر اياه
علامات الكورنيش محفوره في شريط العمر
اللي سمعناه
قبل ما ننساه ..والهم يطول
عمك هواري ماجاش صدفه
علشان يرميلك حب الفول
ويسيب السر في حباته
اربع حبات
والبحر كأنه في عيني بنات
بيعيطوا على بكره الخانق
وأنا مضايق
علشان الأزرق في عيوني
أصبح غامق
وأنا عمري ما فضفضت لموجه
غير وحداني
دلوقتي
أنا لازم أمشي ياموج
بس اوعدني نرجع تاني
للبحر اياه
علشان يقرانا بأحزانه
ويقولنا فين البير
وغطاه

عمك هوارى بتاع الفول
فتّشكم ولسّه معاه بتقول
ويقولّك فال لعّيب ومعاه
يملك ملايين واهو محمى قفاه
واحنا اللى قفانا الضرب هراه
وقصادنا الرزق بباب مقفول مقفول

عم هوارى احد بائعى الفول السودانى على ارصفة البحر

الشاعر الجميل المتميز والمتألق جدا
الاستاذ محمد الحناطى

احييك على تلك القصيدة الجميلة
اربع جهت ع البحر
وهذا الابداع الرائع
دمت ودام ابداعك الجميل
وتقبل مرورى المتواضع وشكر

الشاعر المبدع القدير محمد الحناطى
رائعه جدا من اجمل ما قرأت
قصيده صوفيه ممتعه حواريه مع البحر
كتبت بفن واتقان وروعه فى التعبير
دمت مبدعا متألقا محلقا فى سماء الشعر
تقلى مرورى وتقديرى
وهذه لابداعك وتميزك

ماشى يا حناطى
ردى عليك فى قصيده
كوز واحد و بيشبع
عموما اكيد روعه وخرافه وكل حاجه حلوه
مستنيك ف كوز واحد وبيشبع
تقبل فائق احترامى وتقديرى
دمت بكل خير
ملحوظه
الحناطى مش بخيل يا اخونا

الشاعر المبدع عمرو زتون ما كانش تحدي دي روعتكم وجمال اسكنرية اللي كان بيتكلم جوايا

الشاعر الكبير المبدع عادل عوض سند الكبير كبير والله ومرورك له مذاق مختلف له مذاق الابداع

المبدع الراقي فوزي الشربيني مرورك شرف كبير تقبل مودتي وامتناني

عزه يا عزه يا اجمل عزه
شعرك زي جمالك لذة
وليكي جوه القلب معزة
دي مشاركاتك زي ردودك
اقراها وقلبي بيتعذى

الشاعرة الراقية أميرة البدري تعليق ممتاز يتسم بعمق التحليل على بساطة التناول ، بجد متشكر أوي وسعيد لمرورك يا ميرا تقبلي مروري

عمرو شاهين انا مستني قصيدة الكوز مع اني انا كنت اللي بفرط بس ماشي مستنيك ياعم وبطل بقى شقاوة