احلام غير مطابقه للمواصفات

أحلام غير مطابقة للمواصفات


كل مولود أتولد
واخد قراره ب الرحيل
ف لا بديل عن إن أنا
ميت قديم
ف ليه بقى
نفضل نبعزق
ف المشاعر والغنا
وانتى وأنا
كل اللي بينا
زى قطه بس واقعه
جوه جردل فيه صابون
لو مره تلعب رجلها
علشان تطل بوشها
بره الإطار
ب تفور رغاوى
ف الطبق
تغرق قوام
_ انتى وأنا
على مركبه
ف وسط المحيط
والريح ب يرزع
ف الشراع
يبعد بعيد
الجوع بيقرص
معدتي
ف تصبريني
ب حضن جامد
ويا بوسه
ف الرغيف
ف اشبع أنا
واغزل الأمواج ف عقد
وادهولك تلبيسيه
و ب تعطشي
ف بصبلك
حلو الكلام
جوه كوبايه شجن
ف تاخدى شربه
تبل ريق
تستطعمي
وشفطه شفطه ب تشربى
يروح العطش
الودن تلمح من بعيد
صوت للخطر
عمال ب يعوى
ب انتظام
مديت ايديا عشان
أطوق دمعتك_
بصيت عليكى
ماشوفتكيش
كل اللي شوفته
كان يادوب
جلابية خيش
ودّيت عنيا
واحده واحده
لليمين وللشمال
ف لقتنى نايم ع
السرير
والملاية مكلفتانى
والمخدة مكفنه
شعر الدماغ
تاهت عنيا ف الفراغ
ولمحت صوره ب تبتسم
فضحكت أنا
وسرحت حبه
ف اللي راح
بيعتى عقلي
حته حته
للي بيغشوا التاريخ
دافنه لحمى ف البسلة
جوه أطباق الطبيخ
لهو كنتى فاكره
إن جسمي
يتعمل به منه فته
عمر الخيار
ما اتقت قته
ولا حتى غيّر
ملته وأصبح
جزر
ف ما تحلميش
انى هاخضع للبشر
اوحتى لما الحق
يأذن بالفراق
ممكن أيدينا تتشبك
ف الاحتضار
بوله قمار
والكل فيها خسرانين
البلية لفت
ف المدار
لفت عيونا أجمعين
مستنين
البلية توصل للقرار
وعشان تدمر عمرنا
وقفت ما بين صح وغلط
رمله وزلط
وطوبه طوبه
نبنى سجن
للي ناويين
يعشقوا
والضغط يخلق
الانفجار
ف ماتزعليش
لو جيت ف ليله
و روحت كاشف
كل سرك للبشر
لكل واحد يعرفه
وعامل مغمض
واللي سايق
ف الهبل
على انه لسه ما يعرفوش
وماتصرخيش
لو جيت ف مره
و روحت هادد
معبدك فوق الجميع
شمشون جديد
ولسه خارج للبشر
ف ماتحسبيش
نفسك دليله
أنا قوتي ماهياش
ف شعري أو دراعى
ولا حتى قوه تروح ف ليله
أنا قوتي
ف كلمه ك الرصاص
تنخر قماش
البارفانات
وتنور اللي مستخبى ف القصور
الجمهوريه
ف مافيش
طريق
غير هوا واحد للأسف
ولكنه مفتوح الجناب
على مسلكين
الاولنيه
هي انك
تعقليها وتعدلي
وتحدديلك خط سير
والتانيه هي
انك انتى تنوى قتلى
وتقدري تدوسي الزناد
وتموتي كل اللي زيي
علشان تفوقي
للي وارد ماكس فاكتور
وتلوني وشك أوى
وتضحكي ف كل الصور
وتشوّنى كل اللي بينا جنب
صندوق الزبالة
ماهوا برضوا هايعود
عليكى بالاستفادة
ها تجمعي كل القطط
عند الزبالة
وتسيبى لحمك للضباع
علشان بتقرف م
القطط