الحرون .. شعر / محمود عبد الحليم

رغم انتمائك ..
للتجاهل .. والانا ..
بتقيد شرارة وعينا...
وتهزنا .. يسقط رطب من قلبنا ..
وبرغم حرصك .. ع الوقوف فى وشنا ..
الفضل لك .. فى قلعنا ..
***
رغم اندهاشك ..!! وافتقارك للثبات ..
حين ظهور الفجر ف عيون الولاد..
طلعتنا .. من قمقم الابعاد .. شداد ..
حفزتنا .. نثبت وجودنا و الطريق .. مفتوح لنا ..
فجرتنا .. طوفان مشاعر منتشر..
سلمتنا السكة اللي كانت مفرده..
ومسيرنا نأخذ حقنا ..
رغم انتمائك .. للتجاهل والانا ..!!
لا تندهش ..
فالمنع مفتاح العطاء..
والمنتمي .. للرفض حتما..
يبقي للإيجاب سبب..
حتي اعتراضك .. همنا .. ويهمنا ..
والهمه أول شرط فى بداية الطريق ..

يا ايها الفرس الحرون ..
قبلك التاريخ مسجل .. ناس كتير ..
هما الاساس فى فننا ..
ابن النديم .. ووراه بديع..
بيرم بفنه .. لساه بيعشق مصرنا..
ونقول كمان .. عمك فؤاد ..
بحر الاصاله ف شعرنا ..
و ف قلبه عاش حلم الجميع..
آية تنور دربنا ..
وبشعره وبفنه العظيم..
صار له الرياده ف عصرنا..
ومعاه صلاح .. شعلة كفاح..
شايل ملامح ارضنا ..
وصحيح جاهين .. حارس أمين ..
علي كل نقطة ف دمنا ..
وكتير.. كتير .. أهل العطاء..
لا كبرياء .. ولا انحناء..
ولا حد فيهم كان سبب لمنعنا .. أو قلعنا ..

يا أيها الفرس الحرون ..
لا تندهش ..
أهل العطاء اللي مضوا .. ليهم وجود ..
وكتير لهم .. افضال عليك ..
لولا فؤاد .. لولا صلاح ..
ما حد كان اهتم بيك ..
ولا شعر كان لك .. أوغنا..
وان كان فى خاطرك .. أي كلمة لمها ..
حاذر تفضفض بالكلام المعترض ..
لا جلن تكون الصهوه وإحنا بنعتليك ..
زي ما أعتليت ناس قبلنا ..
قلبك معاند .. والحقيقة المضنية ..
إن احنا لازم نعتلي .. فرس العناد ..
ونلجمه .. ونحجمه ..
نجتاز .. نحطم .. كل وهم بترسمه .. فى دربنا ..!!

يا أيها الوجه العبوس المشراب..
لو يحتويك الفجر يوم ويغلفك..
بغلاف سماوي ومضته .. حلم الجميع ..
لا تندهش ..
حين يحتويك الفجر لازم ينتهي ..
ليلنا المخضب بالسواد .. المكتئب..
وتهل شمس الامنية ..
عناقيد عنب ..
وورود علي خد البنات ..
وتعود لنا الضحكة البريئة الطيبة ..
بدل التحفز .. والتكالب .. ع الوجود ..
أصل الوجود ..
اللى انت فاكره حكر ليك ..
جيكون لنا ..
***
لا تندهش
فجر الأمانى الطيبة .. والابتهاج ..
شأشأ على كل القلوب الملهمة ..
عصافير تزقزق ع الشجر ..
بتحب حتى الرفرفة .. والشأشأة ..
وتقول حرام الحق يقتل حلمنا ..
فى قلبنا ..
***
بيتك ياعبد الله زجاج ..
واللي ابتدا بالرمي أصله منتمي.. للإعوجاج ..
واللي إنتمي .. لتجاهل .. والانا ..
مالهوش وجود .. فى قلبنا ..