من بعيد لبعيد باحبك " إلى حبيبتي مصر" - طارق منيب

من بعيد لبعيد باحبك
بس حبك جوة قلبي
أما لو قربت جنبك
حاخسرك واخسر حبايبك
أصل عيشتي فيكي صعبة
أيوة صعبة ليه حاخبي
وانت حبك جوة قلبي
بس لو قربت ليكي
لازم ألعن يوم ماجيت
وارجع ابكي واقول ياريت
حاجة فعلاً تبقى صعبة
لو ندمت أو قاسيت
..................
حاسألك سؤال وجاوبي
انت ليه بتكرهينا
سايبة ناس تايهة فـ شوارعك
ويا ناس شرم ومارينا
المعادلة حتبقى صعبة
أيوه صعبة ليه نخبي
لسة أيه في المستخبي
لما ناس مش لاقية عضمة
نفسها تموت ياريت
وارجع ابكي واقول ياريت
ألقى نفسي فـ يوم نسيت
فقر سكر ولا زيت
.................

ليه تملي نقول حضارة
واننا تاريخ وأمة
ده الحضارة مش قذارة
ولاناس مش لاقية لقمة
المعادلة حتبقى صعبة
أيوه صعبة ليه نخبي
يبقى حافتح تاني قلبي
طب ماتقفي لحظة جنبي
لو رجعنا نقول ياريت
اقرا تاني وقول قريت
واوعى يوم تقول نسيت
مصر حتى لو قاسيت
....................

الاستاذ الكبير
طارق منيب
وحشنى تعلمى من سيادتك فنون الادب والشعر
ولكن سيدى الفاضل
احنا اللى قلبنا الحضاره قذاره
احنا الجناه مش مصر
دامت روائعك عامره
ودمنا نفتخر بها

يمكن اللي حك الفكرة دي عندي

حبي الشديد لمصر

ولما أنزل أجازة

أبقى مشتاق إن الأجازة تخلص وامشي تاني

ليه .. الأسباب معروفة للجميع

تناقض غريب عشقي الشديد لمصر

وأنا ماباطيقش أعيش فيها

من نفس المنطلق اقدر استحضر جملة القائل على اسم مصر التاريخ يقدر يقول ما شاء ... ما يقول زي ما يقول يعني هي الشتيمة بتلزق

للاسف جعلونا نتمنى الخروج منها فللاسف اصبح اما ان تكون من سحرة فرعون واما ان تكون من قوم موسى الذين سامهم فرعون سوء العذاب و ذاقوا من صنوف الظلم ما ذاقوا...

قصيدة رائعة كما عودتنا ... انا احب بساطة اسلوب حضرتك مع عمق الفكرة الممزوجة بالسخرية المليئة بالوجع ... دمت بكل ود

تصدق ياأحمد .. أعشق مصر وأبكي وأتألم وأضحك وأفرح وأموت من أجلها

ولكني لا أحب ولا أتمنى أن أعيش فيها لأسباب كتير .. يمكن تكون لمستها من القصيدة