حلم المحروم

موضوع: حلم المحروم السبت يونيو 07, 2014 5:53 pm

الثورة حقيقة وبنعشها والدم دليل

والمصرى حقيقى بينصرها ولا يوم هايميل

من خمسة وعشرين شهدائها رسمولنا طريق

وأمانة سبوها ف رقبينا ولجيل ورا جيل

وبلدنا الحرة برجالها حملوا الأكفان

وكتاب المولى دستورهم أعزب ألحان

والوطنى الخالص مايفكر أبدا يخدع

هيموت وترابها بيحنى أجمل إنسان

القصد ف قلبى وف قلبك والمولى رقيب

ع النية محدش بيفتش ولا حتى طبيب

الثورة ووقفت ثورها هى المشهد

أما اللى بيخدع وينافق مش منا :غريب

من قال على علم بأحرارك والحكم شديد

راح اقول له مين ملكهولك والفكر شريد

دا كتير ف بلدنا م الخونة قول لى عليهم

جايز م الخبرة هانتعلم ونعيد ونزيد

يا خسارة يا مصرى على دمك ف بلدنا رخيص

بيسيل وبيكتب أحزانك مستنى بصيص

من نور ف نفقنا عشان مارد يخرج للكون

ثائر على الظلم وعلى دينه ماسك وحريص

من قال ف الحق بنتجادل ونمارى ويطلع صوت عالى

يا جماعة كفاية أتفرقنا على أسم وصورة ومش غالى

والحق الواضح قدمنا حوليه البوم تنعق لينا

وخلاص بقا كل واحد قاعد يحكم على دينك أوحالى

ومنين ولمين يااهل بلدنا تخوين الناس يصبح عادة

وبكل بساطة تشوف نفسك واقف تتحسر بزيادة

من مر شماتة وكأنك خاين معدوم الإحساس

وسيادته بيمثل فيها شرطة ومحاكم ونيابة

مش عارف ليه عندى حكاية وعجبها كتير

الشعر ف أصله يعلمنا فكر وتغيير

فيه منه معالم عشناها ورجال عايشين

ومنين هانجيب قلب قريب وف قلبه ضمير

الثورة هاتفضل شعلتنا من يوم ورا يوم

وهانكتب بالدم فصولها ونغوص ونعوم

ولكل دخيل أحنا رجالها لو حب يكون

هاندوس على راسه ويتحقق حلم المحروم

موضوع: رد: حلم المحروم السبت يونيو 14, 2014 5:25 am

عمل يستحق التحية والإشاده
تقبل إعجابى بعملك المتميز
واسأل الله ان نجد أفضل مما نتوقع
وان لا يضيع دم الشهيد
كل تقديرى واحترامى للعمل والشاعر والفكرة والغايه
ودمت بكل خير

موضوع: رد: حلم المحروم السبت يونيو 14, 2014 6:13 am

أحمد عطا كتب:: عمل يستحق التحية والإشاده
تقبل إعجابى بعملك المتميز
واسأل الله ان نجد أفضل مما نتوقع
وان لا يضيع دم الشهيد
كل تقديرى واحترامى للعمل والشاعر والفكرة والغايه
ودمت بكل خير
الشاعر المحترم الأستاذ / أحمد عطا

سعادتى بمرورك لها أكثر من سبب

أولا أنه الأول على أى عمل لى

ثانيا أنك بالفعل شاعر متميز وقد قرأت لك أعمال على المنتدى وأثارت إعجابى

ثالثا أن التعليق يستحق الأشادة لأنه موضوعى وأتمنى

دوام التواصل

دمت محببا