مين قتل

مين قتل

مين طفي نور الشمس

وسرق حلم النهار من عين الصغار

اللي شاف امه فى تابوت

وابوه جوه المعتقل

وسؤال جوه منه غصب عنه بيسئل

مين قتل

مين اللي مجني عليه ومين المتهم

وفين الربيع اللي عليه بنينا الهرم

يا ضحكة سافلة ومجرمة

رسموها فوق الوش رسم

يا حمل كاذب من حلم عازب

قتلوا فيه الحلم نطفة

وقالولنا ايه العمل

ومين قتل

مين اللي أجرم يا وطن ومين الشريف

مين اللي عاص روحه دم ومين النضيف

مين اللي صادق

مين اللي نافق

مين اللي عاشق ليكي بجد

مين اللي كمل

مين اللي سلم

مين اللي بينا بيبني سد

مين اللي لسه حلمه هـلال

ومين اللي فينا حلمه أكتمل

و مين قتل

مين اللي ماسك بندقية

ومين اللي ملفوف بالكفن

مين اللي باعنا وباع القضية

ومين اللي تبت فى الوطن

مين اللي قال يوم م الميدان لما أتملي

طالبين بحل المشكلة

بعد الململة والبسملة

خُلق الانسان من عجل

و مين قتل

مين دبح بنصل بارد

أيه  خلي ربيعنا بارد

وليه الحمام جوه اللومان

بعد أما كان فارد جناحه ع الميدان

مين اللي خان

مين الجبان

مين اللي روحه فى الميدان

بترسم من دخان القنابل حلم وأمل

و مين قتل

فى أيده دم

فى عينه دم

كلامه وهدومه غرقانة دم

وقالنا بصوته الوديع

بعد أما سمي بالربيع

شعبي المطيع

يا حتة مني

غصب عني

سبق السيف العزل

و مين قتل

سؤالي مش سخيف

والاجابات دايما سخيفة

دايما مخيفة

والناس ضعيفة وأبريا

مستنين المعجزات

محناش فى زمن الأنبيا

يا طيبين يا أغبيا

السقا اللي كان ابوكوا مات

يا نحل جوه الدبابات

مش عايزين منك عسل

عايزين اجابة ع السؤال

لجل الدايرة تكتمل

مين قتل ؟؟؟؟؟؟؟؟؟؟؟

عادل عوض سند كتب:

                           اخى الشاعر الجميل
احمد رجب معيط
نص صريح وبه الف سؤال .
واظن الإجابه واضحه الآن بعد قراءتنا ومشاهدتنا للأحداث .
وازعم اننا فى الطريق الصحيح .
لاتقلق على مصر .. فهى الآن فى ايدى رجال يخافون الله ويحبون مصر .
مودتى وتحيتى ...                                                                    

اشكرك استاذي العزيز عادل سند وانا لا اقلق على مصر فهي محروسة باذن الله اما حكاية رجال يخافون الله دي مش واثق فيها اوي واتمني ان نكون على الطريق الصحيح

أخي العزيز الشاعر /أحمد رجب
عمل جميل
وبه العديد من التساؤلات
استمتعت بحضوري هنا

عماد عبد الحكيم كتب:

أخي العزيز الشاعر /أحمد رجب
عمل جميل
وبه العديد من التساؤلات
استمتعت بحضوري هنا

صديقي العزيز عماد عبد الحكيم اشكرك من كل قلبي
استمتعت بمرورك

اسجل اعجابى وتقديرى

واعتقد لن تجد ردا جميلا على تساؤلاتك الجوهرية

طاهر طاهر كتب:

اسجل اعجابى وتقديرى

واعتقد لن تجد ردا جميلا على تساؤلاتك الجوهرية

تحياتي اليك ايها الرائع

تقديري ومودتي