تعرف تسكت

تعرف تسكت

تعرف تسكت
هتغني لمين
نايك ضايع
واللحن حزين
ومحدش قادر يسمعلك
ما الناس تعبانة
او مكتئبين
ما هو طول اليوم
بيزفوا الهم لدمع العين
والسنة عايشينها فـ عيد هالوين
مستغرب ليه
ما تبص لنفسك
هو انت اللي انت
كان من سنتين
كان صوتك دافي
كنت بتضحك
كات دقة قلبك ف اللحن بتفتح ميادين
دلوقتي صوابعك م الرجفة
مبقتش بترقص على المزمار
لما بتطلع ولا بتنزل
خايفة تشاور باشارة رابعة
تروح طايرة زي الباقيين  
خايف لتغني تروح قايل
كلمة تزعلهم يضايقوا
فاتشيل الطين
كلنا خايفين
كلنا شايفين الظلم ونعمل
مش شايفين
كلنا ماشيين
على حد السيف
رجيلنا بتشلب
مش حاسين
لكن قابلين
ومدام راضيين
نستاهل كل اللي بيجرا
مااحنا بوشين
وش بيضحكلك والتاني
شايل سكين
الوش اللي بيضحك اول
مايشوفك يسال يا معلم
كنت معانا
والتاني يكمل باستنكار
ولا مع الناس التانيين
اختارلك واحد  م الجنبين  
اما انت سيادتك في الحالتين
ميت ميت
هتغني ازاي
هتغني لمين
انا واحد عايش مش سامع
غير الطواحين
بطلت احاربها ودلوقتي
متعلق وبلف مغمي
في عنيا وعايز م الدنيا
بس سجارتين
انفح فيهم غنوة اكتبها
وانت تلحنها ف سطرين
بلادي بلادي بلادي
لكي دخاني ورمادي

أخي الكريم الشاعر / حاتم أبو كامل
عمل جميل أخي
وختام رائع
أنتظر جديدك أخي

اخي الكريم عماد بك عبد الحكيم تحبة تقدير وامتنان لمرورك الكريم وتعليقك الجميل اتمنى ان اكون عند حسن ظنك بي داءما