رُباعيات من الذكريات / رضا محمود

سألوا زمَان فَرعون..إيش فَرعنَك عـ النّاس

قَام ضاحِك (المَلعونْ)..وقال بكُل حمَاسْ..

شوفت البَشَر بتكِشْ..وقلوب بتهوى الغِشْ

واللّي يقول مَعلِشْ..واللّي يطاطي الراسْ..

ساعتها قولت خلاصْ..ونزلت فيهُم حَشْ

ما هو لمّا تُحكُم (جَحشْ)..لازم إيديك تتباسْ!!

يـاربّ..إشَهَدْ عليّا...(إنّي مش راضِي)

عن كُل باطل بيرفَعْ صُوتُه عـ الفَاضِي

وبإسم دينَك.. بيشعل فتنَة بين النّاسْ..

ويكون علينا الحَكَمْ..والخِصمْ..والقَاضِي !

اللي النهاردة انجرحْ..بكرة يبات فرحانْ

والقلب مهمَن فِرحْ..لازم يشوف أحزانْ

والصبر أجمل دوا..للقلب في الحالتين

والربّ من رَحمتُه....أكرمنا بالنسيانْ !!

النّاس معَادِن..وفيها (الأصلي والتقليدْ)

فيه اللّي زيّ المَاس قيمتَك معَاه بتزيدْ

وناس بلُون الدَهَب بس الأسَاس قِشرَةْ

تلقَاه مَـعَ العِـشرَةْ..يقلب ويبقى حَديدْ!!

ما تضحكيش بالكِدب على رُوحِكْ

وما تشـتريش الحُبّ (بجـرُوحِكْ)

أغلَى ما فيكي بالرّخيص بعتيهْ..

وكسبتي إيه..بعد انتهَاك رُوحِكْ ؟!

نام الفـقير.. (يحلم بكِـنز المالْ)

بَس الغني مش لاقي راحة البَالْ

وفـ ساعة واحدَة استسلموا للمُوتْ

نَفس التَابُوتْ..والفَرق فـ الأعمَالْ !

وبرغَم إنّ الموتْ..كاس عـ البَشَر بيدُورْ

والكُـلّ في المَلَكوتْ..لازم يصيبُه الـدّورْ

دايماً دموع الألَم وَقت الفُـراق بتزيدْ..

دا الحُزن مش بالإيدْ..والمُبتَلِي مَعذورْ !

سلامُ الله..على الرّوح الأبيّة

ياسين الشّعر.. لبلادُه البهيّة

يا مَلح الأرض ولسان الغلابَة

(يموت الرّمز..وتعيش القضيّة)
...............................
في رثاء عمّنا..أحمد فؤاد نجم (رحمه الله)

الله يجازي النّتْ..خلّي عقولنا تتبرّجِلْ

الشّب زي البنتْ..والستّـات بتسترَجِلْ

إنعدمت الأخلاق..وانحدرت الأذواق..

ونلاقي فين ترياق..للنّاس عشان تِخجَلْ!

الله يجازي النوايب..كُل خير.. عَنّي

غَربلت بيها الحبايب..لمّا خاب ظنّي

عِرفت مين اللّي صان الودّ والعِشرّة

والفَرق بين الدَهَب والفَضّة والقِشرَة

فهمت طَبعْ البَشَر وبصَمت بالعَشرَة

إنّ الصديق الوفي من جُملة الأساطيرْ

أصحاب وزي الوَرَق..وسط الرياح بيطيرْ

سوء اختياري السبَب والغَلطّة فـ التَقديرْ

القلب قال كلمتُه..والعَقل تاااه مِنّي !!

كَـفّنْ جروحَك بالأمَـلْ

كَـمّل طمُوحَك بالعَمَلْ

علشان صبَاحَك يكتمِلْ..محتَاج لضيّ !

عَـطّر شعورك بالرضا

إوصَل بصبرَك للفـضَا

سلّم زِمَـامَك للقضَا..طول ماانتّ حَيّ !

مين اللّي باع الوطَنْ..واللّي اشترى كان مينْ

مين اللّي قبَض التمَنْ..(بدل الجنيه.. ملايينْ)

الحاكم اللّي اتخلَع بالثورة في التحرير..

ولاّ اللّي دَخلَوا السّبَق..رافعين شعار الدّينْ ؟!

فيه ناس بتعشق جمال الشّكل والمَظهرْ

وناس في عشق الرّوح..بيشدّهَا الجَوهَرْ

جايز يكون النَـظَر شرارة الإحساسْ..

لكن طبَاع النّاسْ..تغلب على المَنظَرْ !!

قالوا عنّي فـ الحياه..(شاعر..ودارِسْ)

كلمتي طوق النّجاه..وضميري فـارِسْ

ومايعرفوش إنّ القصيدة بنت جرحي

وما يفهموش إنّ الهموم..أكبر مدارِسْ !!

قالوا (الولَد).. عُكّاز بيسند ضَهر أهلُهْ

وأبو ( البنات ) في الهَمّ غرقان للمَماتْ

أنا قولت واللّي يقول كدا موصوم بجهلُهْ

فيه بنت أجدع مـ الرجال..واقفة بثباتْ !!

طرطق ودانك للكلام واسمعُهْ
واستفتي عقلك قبل ما تصدّق
فيه ناس تجيب الكدب وتلمّعُهْ
ويلـبّسوا الباطل تياب الحَقْ
قلبك دليلك.. والقلوب أرزاقْ
والفَرق بين الخلق فـ الأخلاقْ
صدق اللّي قال العقل بيت الدّاء
دا العلم نور والجَهل نار تحرقْ !

بيقولوا عن أهل الغرام حواديتْ
والنّاس بتاخد بالكلام.. والصّيتْ
والخوف..بيفرض عـ القلوب حاجِزْ
آلاقيني واقف من بعيد عاجِزْ
لو كُل حلم بنحلمُه جايزْ..
كان قلبي يعشق..زي ما اتمنيتْ !!

يابن آدم..
ياللّي ناسي بإن أصـلك من ترابْ
والبشر في الأرض مخلوق للعبادةْ
وإنتّ طول الرحلة عايش في اغتراب
ليه نسيت إن الرضا (سرّ السعادةْ)

إمسك لجام الغلطة..قبل ما تغلبك

وامنع عيونـك عن عيـوب النّاسْ

الدنيا ترمي الفتنة تيجي فـ ملعبَك

والنّـفس للقلب الضّعيف وسواسْ

ربّ العبـاد لمّا اصطفى.. للنّـاس إمـامْ
كان الحبيب المُصطفى..مِسك الختامْ
دعوة سلام بين البَشَرْ
قُـرآن..يلين بيه الحَجَرْ
والبَدر من نورُه انشَطَرْ..وسط الغَمَامْ !
وبدعوة الهادي الأمينْ
نـوّر قلوب المُسلمينْ
بالعَدل والحق المُبينْ..سادوا الأنـامْ !

وعشان بيقولوا الجوع كافرْ

والرزق..يحب الخفيّة

عايشين بنكافِح.. ونعـافرْ

مع إن الأرزاق مخفيّة !

مش كل مرّة بتسلم الجَرّة
ولا كُل طعنة غَدر..تبقى نصيبْ
ربّك سترها على البَلَد مرّة
لكن ياخوفي يجيلها يوم وتصيبْ

عشّمتني بالحَلَق.. وخرمتلك ودني
سلّـمتني للقـلق..والحيرة تـراودني
ياللي الوعود سلعتك وتجارتك الأوهام
لمّا انتّ آخرك كلام..كان ليه بتوعدني!

إذا الشّعـبُ يومـاً أراد الـرئيـس
فـ لازم يفـوّض فَـريق أو مُشيرْ
ويسمع نصايح عكاشة ولميس
ويقفل ودانُه..وبـلاش يستشيرْ

رَقيتك من عبيد الجاه..وساسة بتصنع الفراعينْ
وعبد يبوس إيدين مَولاه..ويفتـح بابُـه للملاعينْ
ومن إعلام..يصقّفلَك.. وصوت باطل..بيهتفلَك..
وإيد جـلاّد بتكشفلَك..ضُهور الخَلق في الزّنـازينْ

» رُباعيات عن الكلمة / رضــ محمود ـــا
» ][ :: رُباعيات :: ][
» الشاعر الكبير محمود خالد محمود
» سجن الذكريات
» عطر الذكريات