رُباعيات من الذكريات / رضا محمود

ياللّي بنور رَحمتَك..كُل الصعَاب بتهونْ
ومن عَظيم حكمتَك..رزق العباد مَضمونْ
أُرزقني توبَة نَصُوحة.. ترُدّ فيّا الروحْ..
بَاب الكريم مَفتوحْ..لو ضَاق براح الكونْ
**********
بحَق وَقفة عبَادَك.. فوق جبَل عَرفَاتْ
ورجوعنا للتشريق والسعي والجمَرَاتْ
بحق لُطفَك بـ (هَاجَر) وقت شدّتهَا..
تلطُف بنا ياكريم..من (فتنة الخِلافاتْ)
**********
سَايق عليكي النيلْ..والأهرامَات..والطُورْ
ورَوعِة التفَاصيلْ..في تاريخِك المَسطُورْ
سَايق عليكي الكَرَم..رَغم اختلاف الزَمَنْ..
تسقيني(جَرعِة وطَنْ) تفتحلي طَاقة نُورْ !!
***********
سَايق عليكي النَبي.. يا (مؤمِنَـة بالله)
لا تآمني يوم للغَبي..ولا تحتمي بحمَاهْ
ما تسلّميش للقُطط مُفتَاح (كَرارْ البيتْ)..
وترضي بالفتافيتْ..من إيد عَبيد الجَاهْ !!
***********
سَايق عليكي البَطَلْ..إبنك (صَلاح الدّينْ)
وفَرْحِك اللّي اكتَمَلْ..بالثورة فـ الميَادينْ
تلمّي وَرد الجنَاين من إيدين المُوتْ ..
ماعدش فيهَا سكوتْ..ولا صَبر عـ الفَاسدينْ
**********
حَبّة وجَع.. متقسّمين على كام مِيدانْ
مين البرئ في المَعركَة ومين المُدانْ ؟!
مين اللّي في إيديه تنتهي كُل الخُيوطْ
لمّا البَارود.. بيغطّي على صُوت الآدانْ !
**********
حَبّة كلام.. في القَلب لسّة.. مااتقالوشْ
يا خَلْق برتوش البَشَر.. وقلوب وحُوشْ
حَتّى الوحُوش مابيشربوش دَمّ الوحُوشْ
بسّ الغَريب...إنّ (البَشَر) ما بيرحَموش !
**********
دَم الشهيد يابلد ..محتاج قلوب بتحِسْ
مش بالدموع والخُطَب..وكلام مُثير يترَصْ
محتاج قرار بتّار..يقضي على الفاسدينْ
(حتّى في حُكم الدّين....النَفس تَمَن النَفسْ)
**********
خُد من ضلوعي القَلَم..والحبر من دَمّي
واجمَع حروف الأَلَمْ..من حُرقتي وهَمّي
إكتب كلام للزمَنْ..يجمع شتَات الوطَنْ
وارجم شيطان الفتَنْ..بالفُصحى والعامّي
**********
بالكلمة تفتح قلوب..وبكلمة تقفلهَا
وكلمة تمحي العيُوبْ..والمايلَة تعدلهَا
إمسك لجام كلمتَك وبلاش تعيد وتزيدْ
لو كُنت فعلاً رشيد..إحسبها واعقلهَا
**********
مش كُل واحد.. يقولك كلمة تسمعهَا
ولا كُل دمعَة بتكوي الروح وتوجعهَا
فيه ناس تعامل ضميرها وتختشي العيبَةْ
وناس غَريبَة..تضلّ النّاس وتخدعهَا !!
**********
يا مسرسبة الأحلام من عمري بالتنقيطْ
ومعَـلّقة الأيام براويز خَـشب عـ الحيطْ
يا بلاد وفيها حاجاتْ..ملقتلهاش تفسيرْ
إيه لازمة الشهاداتْ..والخِبرَة والتقديرْ
والحِلم لسّة أسيرْ (للواسطَة والتظبيطْ) !
**********

بأمر الله ستكون هذه الصفحة لتوثيق رباعياتي التي أكتبها بصورة مستمرة على الفيس بوك..ومرحباً بمن أراد المشاركة من الأعضاء الأفاضل.

من وحي الأمثال الشعبية ( المجموعة الثانية)

****************

لو كان حَبيبَك عَسَلْ..ما تلحسوش كُـلًهْ
صَدَق كـلام المَثَـلْ..ياللّي انتـوا بتـمِلّوا
عِرفنا كُل العِبَر..من حِكمةِ الأجـدَادْ
الشوق يزيدُه البِعَادْ..وكُتر القُرب بيقِلّهْ
**********
دَاري على شَمعتَـك..رغم الرياح هتقيـدْ
حَافِظ على سُمعِتَكْ..وبلاش تعيد وتزيدْ
لا حَد يمسح دموعَكْ..غير كُفوف إيدَكْ
ولا حَد يقدَر يفيدَكْ...(لمّا الإله بيـريـدْ)
**********
ودنَـك منين يا جُحَـا..مِسِك الودَان بالعَـكسْ
اللّي ما شافشي الضُحى..ينكر شروق الشَمسْ
والجَاهِل المَغـرُور..لازم يكون مَعـذورْ
دا العِلم زي النّـورْ..يهزم ضَـلام النّـفسْ
**********
قالوا الجواب بيبَانْ..من شَكل عنوانُهْ
والوَرد في البُستَانْ..عِـرفوه بألوانًـهْ
لكُل فِعل دليلْ..والعِـلّـة فـ التأويلْ
تبدأ ساعات الليلْ..لمّا النّجُوم بَانُوا
**********
القِرش لابيض بينفَعْ..في الليَالي السُـودْ
كُل اللّي يُشكُربيشبَـعْ..والرضا مَحمُـودْ
إعمل حسابك لبُـكرة.. قبل ما يجيلكْ
إرضى بقليكْ ..وخَلّي الجُودَة بالموجُودْ
**********
الشاطرَة تغزل خيوطهَا..لو بِرجل حمَارْ
والخايبة يظهَر غلطهَا..وتكـتَر الأعَـذارْ
حُسن التَصرُف هِبَةْ..من خالِق الأكوَانْ
والعَقل زي الميزانْ...والبيُوت (أسرَارْ)
**********
صَـوّب سِهَامَك للنّجُومْ..جَايز تصيب المِـئذَنَـةْ
أنفُض غُبَار يأسَك وقُومْ..طُول ما الأمَاني مُمكِنَةْ
خَلّيك في أحلامَك عنيدْ..دا اليَأس بيفلّ الحَديدْ
والصَبر و العَزم الشدِيدْ..طَبع القلُوب المُؤمِنَةْ
**********
تشتم أبويا الرخيصْ... أشتم أبوك الكويّـس
السّبْ للسّبْ ترخيصْ..لو كانت قاصِد تهيّسْ
تصون لسانك يصونكْ..ولو تخونُهُ يخونَكْ
إفهم بنظرة عيونَكْ..وإحفظ مقامَك يا ريّسْ!!
**********
إعمل بخمسة وحاسب البطّالْ
وداري عيبك عن عيون النّاسْ
قرشك في جيبك لو زمَانَكْ مَالْ
والستر بين الخلق تاج عـ الراسْ
**********
قُصر الكلام منفعة..ياللّي انتوا مش فاهمين
واللّي يعيش إمّـعَة.. يصبر على اللايمين
كُتر الكلام يجرحَك..ويقلّ من قيمتَـكْ
وآديني فَهّمتَـك.. بس اللّي يسمع مين؟!!
**********
ديل الكـلاب بيميـلْ..لوحَتّى فيـه قالبْ
الحُرّ دايماً أصيلْ...أَمّـا الخسيس عااايبْ
لو كنت ناوي تعيش.. بين العباد مستــورْ
لا تصاحب المايلْ..ولا ترقّع في توب دايبْ

عيش بالأمان ياولد قبل الاوان مايفوت
واعشق تراب البلد وامشى عدل مظبوط
شيلها فى قلبك وبين الرمش والننىّ
وآهى كلمه منىّ ياريت تسمعها قبل ما موت
,,
قالولو مولود (جديد ) بجنونى حبيته
ملـّكته نصّ البلد وفى عينى خبّيته
آهو عاش حياة الترف مانفعش يوم نفسه
خللانى اندم واقول ياريتنى ربّيته
,,,
لمحت عنيّه القمر تحت السّحاب بـيـبصّ
سهران فى ليل الأحبّه وللنجوم بـيرصّ
سألته فين الجمال وايه غيّر احواله
قسم جماله عليك وقال كفاية النص
,,
كان نفسى نصرخ نلاقى حدّ يسمعنا
والشكوى توصل بنفس الطعم والمعنى
والواسطة ترحل بعيد عن كل دولتنا
ونملاها فرحة وقانون العدل يجمعنا
,,
تسلم ايها الرائع
خربشات على ما قسم
لكم التحية

يا معلّماني الغُنا..في الفَرْح والأحزانْ
يابلادي يا مُؤمِنَةْ..من سالف الأزمَانْ
برغم إنّي زرعتك.. بين حنَايا الروحْ
جنيت ألَم وجروحْ.. وتعبت مـ الحرمانْ !
***********
حتـفيد بإيه ثورتـي..والحـلم بيخـونكْ
سامعة مرار شكوتي..ومغَمّضة عيونكْ
ورد الجناين طَرَح..أشواك على الأغصَانْ
وانتي اللّي عارفة السببْ..ومكدّبة ظنونك
************
مات الولَد..علشان بلادُه تعيشْ
حُبّ البلَدْ..خَلّى العيال دراويشْ
أنا مش جبانْ ولا كُنت يوم خوّافْ
لو آكلها حافْ..والبس قميص الخيشْ
***********
راسماني طير مدبوح..ومركّبالي جناحْ !!
وقفلتي باب القفَص..ومضيّعَة المُفتــاحْ !!
وإزّاي أطير للسمَا..واسكُن براح الكُونْ..
وازّاي صعابي تهُونْ..والقلب مش مرتاح !!

ياللّي الحَجَر بيلينْ..من آية في كتابَكْ
إكتبني في التَايبينْ..واقبلني على بَابَكْ
بحَق كُن فَـيَكونْ..يا مَن خَلقت الكُـونْ
ياااارب نفسي أكونْ..من ضِمن أحبَابَكْ
**********
يا ساَمِع الدَعوَاتْ..بتشق قَلب الليلْ
وغَـافِر الـزلاّت... بالذِكر.. والترتيلْ
بحق طه وياسين..والسَجدة’ والرحمَنْ
حَبّبني في القرآن..ودَاوي قَلب عليلْ
***********
إمسك لجَام الكِلمَة.. قبل ما تغلِبَكْ
وامنَع عيونَك.. عن (عيُوب النّاسْ)
بلاش تعومْ على كُل مُوجَة بتعجِبَكْ
جايز في يومْ.. يدور عليك الكّاسْ !!

آخر حِيَل إبليسْ..شُغل (اللايك.. والشِيرْ)
وبكلمتين عـ الفيسْ..عَقل البَشَر بيطيرْ
وبتكتر الخِلافَاتْ..ونصَدّق الإشاعَاتْ
أصل الضمير لو ماتْ..بيموت معَاه الخيرْ !!

أخي الكريم الشاعر الكبير رضا محمود

مجهود كبير في جمع رباعياتك ونشرها في هذة الزاوية

والله قرأت اعلاه رباعيات لا يكتبها الا كبير بحق ،،لا أجاملك وربي

أدام الله ابداعك وموهبتك وسلمت يمينك

كن بكل خير أخي

الرباعيات للتثبيت بواسطتي ليستمتع الجميع بها الروعة والابداع الحقيقي

الى الشاعر/رضا محمود

وحياتى النيل اللى معدّى بطيفك من جنبى
وحيات الكرنك وتاريخه والبرّ الغربى
وقناوى الغالى والوالى والسدّ العالى
مابيشغل بالى فى بعادكم غير شوقى وحبىّ
,,,,,,,,
وحيات العمر اللى أنا عشته من يوم ماوعيت
وحروف الشعر اللى كتبته من أوّل بيت
انّ انت حلاوة اشعارك فى العين والروح
ولابدّ أبوح باللى أنا حاسّه ان روحت وجيت
,,,,,,,,
وحيات القلب اللى مايعرف غير الأخلاص
والعرق السّايل من خدّى على ايد الفاس
والحكمة الحلوة ف موّالك والمثل الساير
وشهامة شاعر ما بيعرف غير حبّ الناس
,,,,,,,,
أنا ماقدر اردّ على كلامك ومعايا دليل
وكلامى بيسكت قدّامك يابو قلب جميل
وبشوفك نهر بيروينا ,وأكون مجنون
لو عقلى يفكــّر يتسامه مع نهر النيل
,,,,,,,,,,

سعدالشرقاوى كتب:: الى الشاعر/رضا محمود

وحياتى النيل اللى معدّى بطيفك من جنبى
وحيات الكرنك وتاريخه والبرّ الغربى
وقناوى الغالى والوالى والسدّ العالى
مابيشغل بالى فى بعادكم غير شوقى وحبىّ
,,,,,,,,
وحيات العمر اللى أنا عشته من يوم ماوعيت
وحروف الشعر اللى كتبته من أوّل بيت
انّ انت حلاوة اشعارك فى العين والروح
ولابدّ أبوح باللى أنا حاسّه ان روحت وجيت
,,,,,,,,
وحيات القلب اللى مايعرف غير الأخلاص
والعرق السّايل من خدّى على ايد الفاس
والحكمة الحلوة ف موّالك والمثل الساير
وشهامة شاعر ما بيعرف غير حبّ الناس
,,,,,,,,
أنا ماقدر اردّ على كلامك ومعايا دليل
وكلامى بيسكت قدّامك يابو قلب جميل
وبشوفك نهر بيروينا ,وأكون مجنون
لو عقلى يفكــّر يتسامه مع نهر النيل
,,,,,,,,,,

إلى أُستاذنا الشاعر / سعد الشرقاوي

وحياة المرَكِب والمينا..وتاريخ حـطّينْ
والرَمْل المتحنّي فـ سينا..بـدَمّ الغاليينْ
يارجَال أبطَالْ..عايشين في نضَالْ
أنا جيت في الحَال..وفـ قلبي حنينْ

وحياة الليل اللّي سهرتُه..فـ حُضن الأشعَارْ
والعُمر الغَالي اللّي خسرتُهْ.. طُول المشُوارْ
إنّك يا حبيبنا ياشرقاوي.. إنسان بصحيحْ
في إيديك مفاتيحْ..تدخل لقلوبنا بدون إنذارْ

وحياة الشعر اللّي جَـمَعنا..على حُبّ النّاسْ
بجمال الأفكار والمعنى..وصدق الإحساسْ
الكلمة بتجرح وتداوي..وبتعزف للحب غناوي
وقصايد سعد الشرقاوي..( زي الألمَاسْ ) !

لو كان سكوتي (رضا)...يبقى انتي مافهمتيشْ

مالقتشي فيكي اللضَا..ورضيت وقولت هاعيشْ

والعُمر راح وانقضَا..وانتي اللّي بايعَاني ..

مانعَاني عن سِكّتكْ..بمُدرعات الجيـشْ !!!

مكتوب علينا الشّقَا..طول ما الحياه بتدورْ

يا حلم في الشرنقَة...محتاج يشوف النورْ

فيه ألف إيد مانعَاك..تلمح بصيص الضيّ

يا حِـلم بُكرة الجيّ..لسّة الجناح مكسورْ !!

أستاذي وأخي الأكبر الشاعر / محمود جمعة..أشكرك على هذا المرور البهيّ والتعقيب السخيّ..فإعجابك يا شاعرنا وسام شرف أفخر به ما حييت..كما أشكرك على التكرّم بتثبيت العمل

مش كُل صاحب قَلَمْ..نقول عليه اللهْ
ولا كُل قلب اتظَلَمْ..قادر يقول الآااهْ
الكلمة سيف بتّارْ..والحكمة فـ الأشعَارْ
والعقل لو يحتَارْ..في الشّعر نور وحياهْ
**********
الشّعر ياابن النّاسْ..أفـكار تِهـزّ الكُـونْ
بالصّورة والإحسَاسْ..والمعنى والمَضمُونْ
الشّعر لُهْ قوانينْ....وعِلم بالموازينْ
وعقل هادي رزينْ..يكتب كلام مَوزنْ!!!
**********
والله وبقالك تَمَنْ..وسط الخُضار يا خيَارْ
الله يجازي الزَمَنْ..والفكرة والأشعَارْ!!!
سوق القوالب جَبَرْ..لمّا النّصَاص قامتْ
تمسك بجُرأة القَلَمْ..وتعيب على الأحرارْ
**********
الكلمة لوتجرحكْ..خَلّي الكلام بحسَابْ
لو كُنت انا مَطرَحكْ..هاقفل عليها البابْ
وابعد عن الأشعَارْ..واشرب سكوتي مَرارْ
وبلاش نقيد النّارْ..أونخسر الأصحَابْ !!

رضا محمود كتب:: مكتوب علينا الشّقَا..طول ما الحياه بتدورْ

يا حلم في الشرنقَة...محتاج يشوف النورْ

فيه ألف إيد مانعَاك..تلمح بصيص الضيّ

يا حِـلم بُكرة الجيّ..لسّة الجناح مكسورْ !!

( رضا محمـود )

مكتوب علينا الأم حتى ف عِز الفرح

نِزرع تقاوى الأمل ولابنلقا طرح

أصحى مع فِكرة .. على أمل بُكرة

الإمس كان ذكرى .. ياريت نداوى الجرح

( حمدى شبانة )

الصديق الأستاذ الشاعر
رضا محـمــود

مساء الرباعيات البديعة

التى تحوى فِكراً داخل الفِكرة

أنت كتبت فأبدعت

وأنا قرأت فاستمتعت

شكراً لك بمقدار ماأمتعتنى

لك مِنِّى كل المودَّة
( حـمـدى )

ــــــــــــــــــــــــــــــــــــــــــــــــــــــــــــــــــــ

حمدى شبانة كتب:

رضا محمود كتب:: [size=24
[/size]

مكتوب علينا الأم حتى ف عِز الفرح

نِزرع تقاوى الأمل ولابنلقا طرح

أصحى مع فِكرة .. على أمل بُكرة

الإمس كان ذكرى .. ياريت نداوى الجرح

( حمدى شبانة )

الصديق الأستاذ الشاعر
رضا محـمــود

مساء الرباعيات البديعة

التى تحوى فِكراً داخل الفِكرة

أنت كتبت فأبدعت

وأنا قرأت فاستمتعت

شكراً لك بمقدار ماأمتعتنى

لك مِنِّى كل المودَّة
( حـمـدى )

ــــــــــــــــــــــــــــــــــــــــــــــــــــــــــــــــــــ

الصبر أفضل دوا..للقلب لو مَجرُوحْ

يشفي جراح الهوى..ويرُد فيك الروحْ

يا عَم حَمدي القَدَر فوق الجبين مكتُوبْ

مهما حاولت هروبْ..تلاقيه منين ما تروحْ

نورت الصفحة يا شاعرنا الكبير / حمدي شبانة..أشكرك على طيب تفاعلك وجمال تعقيبك

بتلومي ليه عـ الولَدْ..لمّا يقول الحَقْ

وازّاي أكون السَنَدْ..وإيديّة جوّة الشَقْ

إيّاك نسيتي شهيد الثورة في ينايرْ!!!

ورد الجناين دِبلْ..ولا عُمر قَلبِك رَقْ!!!

لو كان في حُضنك أمانْ..وقبلتي أعذاري

لو شوفت فيكي الحنان..وعرفتي مِقـدَاري

كُنتي بصحيح تفهمي..أنا قلبي ليه مكسُورْ

وازاي باشوفِك كِـدّا..دايماً في أشعاري!!!

لكُل قلب انجَـرَحْ..في كنيسة الـورّاقْ

وناس في عزّ الفَرَح..تبكي ألَم وفُراقْ

أشهَد بإنّي برئ من كُل (خاين..غَبي)

علشان حبيبنا النّبي..وصّانا بالأخلاقْ !

تابعتها من قبل
وسأتابعها هنا بصمت
دام إبداعك أخي
ف انتظار المزيد

عماد عبد الحكيم كتب:: تابعتها من قبل
وسأتابعها هنا بصمت
دام إبداعك أخي
ف انتظار المزيد

تنوّرالصفحة يا صديقي..متابعتك وإعجابك شرف لي يا شاعر

يجي المَلِك..بَعد المَلِك ويـرُوحْ

والمُلك زايل..والتـاريخ باقي

فِعلَك دَليلَك..والكِتاب مفتـوحْ

من جِنس عَملَك بُكرة هتلاقي !

اللّي يخاف مـ الخَطَرْ..يحكم بشَرع اللهْ

يعدل مابين البَشَرْ..بالحق والمُساواهْ

ويحاجي عـ المظلوم..ويحارب الظَالمْ

رَبّ العباد عالِمْ..باللّي شيطانُه غَواهْ

أصرخ وقول ياقَلَمْ..إحنا اللّي نستاهِلْ

نـنزف دموع النَدم..علشان بنـتساهِلْ

ساكتين على المُفتَري..والظالم المَغرُورْ

ويوم ماقومنا نثورْ..قالوا الشّباب جاهِلْ!!

الذكرى هيّة اللّي باقية..بعد الحياه والموتْ

عاش اللّي مات للوطَن..مهما الزّمَن بيفوتْ

المُلك في الأرض من ربّ العبَاد فتنةْ..

والعَدل في الحُكمْ..غير الظُلمْ..والجَبَروتْ !

» رُباعيات عن الكلمة / رضــ محمود ـــا
» ][ :: رُباعيات :: ][
» الشاعر الكبير محمود خالد محمود
» سجن الذكريات
» عطر الذكريات