بحبك .. كلمه

" بَحِبِّكْ .. كِلْمَه "

أربع حروف

فـ حبك مـ تتقال

ولا توصفك جوايا

يمه العيون .. موال

بحبك .. كلمه

بيقلوها البخلانين

اللي مش عارفين

يحبوا إزاي

بحبك .. توصف هواكِ إزاي؟

إزاي تكوني

كل كوني

وكل الناس

جوه فـ عيوني

وأقولك بحبك !

و إزاي تكوني

أرضي وسمايا

ضحكي وبكايا

وتبقى بحبك

كلمه كفايه !

بحبك ..ده علم من علوم الكون

إيزيس بقى ... و أنا الفرعون

بحبك .. ولّاده

وشِعر إبن زيدون

بحبك سهر

نجمه وقمر

جبال و بحور

رمله وحجر

خُضره ونخيل

غصن زتون

بحبك ملو الكلام من شفايفك العطشانين

ملو الملام ... من عنيكي اللامعنين

عدد نَفَسك وتنهيده دافيه بتنفرش

مابين ضلوعي البردانين

بحبك جمال شَعرك

ساعه قصيّر مره لخصرِك

وياما لمّاه كما الليل الحزين

بحبك جمال جِسمك

كمال رسمك

نغم إسمك اللي حروفه لسه

في وصفك .. كما العاجزين

بحبك حارتنا

أوضتي في بيتنا

كل اللي فيها

عنبر رحتنا

إزاي توصف بحبك ..عنبر رحتنا !

بحبك كلمه في حبك مـ تتقال

ولا توصفك جوايا

يمه العيون .. موال

مات كل شئ فيّا خلاص مبقاش

غيرك يا حتة الحلم اللي عاش

وسط ليالي العتمه

وسط العمر اللي ضاع

وسط الأسامي اللي إتنست

لسه إسمك ... متنساش

إزاي توصف بحبك

جسمي اللي مات وقلبي اللي عاش !!

إزاي توصف دمعه تملا سحاب

مع ضحكه صداها .. لسه منتهاش !!

إزاي توصف بحبك في اللّقا نار

بتحاول تطفي نار شوقي لحنانك

إزاي توصف بحبك تلج مش قادر

يطفي لسعه فـ قلبي فـ غيابك

إزاي توصف أربع فصول في السنه

بيجمّعوا فـ يوم ميلادك !!

إزاي!!

مخلصشي الكلام

بس عمر الكلام

ما هيشفي يا غاليه غليل

ولا كلمة بحبك .. رغم اللي إنحكى ليها بديل

وأنا أول البخلانين

اللي مش عارفين في وصفك

يحبوا إزاي .. بس "بحبك" أكبر دليل

إني بحِن .. وإني بَجن

وإني بشوف الدنيا فـِ نِن

وإني بغير



لــ محمد رشاد