عباسية تحرير

موضوع: عباسية تحرير الإثنين فبراير 11, 2013 4:03 am

السلام عليكم الأخوة والأحباب رواد المنتدى المتميز
أسعد بعودتى بعد غياب وأبعث للصديق الشاعر عاطف الجندى ولكم جميعا بأطيب الأمانى

عباسية تحرير
----
العباسية اللى جايّة .... ولّلا اللى جاى تحرير
قرّبنا نوصل شوية ... ولّلا احنا لسة كتير
---------------------------
فيه ناس بتركب وشايفة ... أدّام هتركب تنام
وناس بتركب وعارفة ... فى اليوم بتركب بكام
وناس بتركب وخايفة ... لو مش هتركب حرام
وناس تزاحم صبيّة ... وناس تدوس ع الكبير
العباسية اللى جايّة ... والّلا اللّى جاى تحرير
----------------------------
إزّاى نعدّى ونوْصل ... والكل عايز يسوق
ولا حد عارف يحصّل ... من أى راكب حقوق
لو مش هنمشى هنعْطل ... والدَخَنَة توصل لفوق
ونسلّم البلطجية ... شهر العسل من حرير
العباسية اللى جايّة ... واللا اللى جاى تحرير
----------------------------
مين اللى قسّم فريقنا ... ثوّار وصامتة وفلول
الدّم أصبح فارقنا ... والنار بتصبح حلول
والحكمة نشفت فى ريقنا ... والثورة قفلت عقول
واحنا النفوس الزكيّة ... واحنا الوفا والضمير
العباسية اللى جايّة ... واللا اللى جاى تحرير
------------------------

الله الله يا شاعر .. المهم ان انت ركبت الطريق الصح.. واما الباقى فكل واحد ركب مخه وانت عارف مبارك ساب امخاخنا شكلها ايه وملى البلد بيها .. لا سامحه الله هو ومن على شاكلته..

أستاذنا الشاعر جمال نصير
كل الشكر على مرورك الكريم
تقبل تحياتى

مرحبا بعودتك وحمدا لله علي سلامتك أستاذ سعد
أسعدني ماقرأت لك هنا شاعرنا المبدع
تقبل مروري واعجابي وتحياتي

كل الشكر أستاذناالشاعر حسن الجمال
مرورك يعطر كلماتى
دمت كريما