قسط و فورى

ايه اللى غاصــبنى ياعم الحاج
أعيش مع واحـــده عقلها هج
وحياتــــــــــــــها كلها تخطـــــــــيط
تاكل تشــرب تصحى تنام
كلة لفـين ومنـين وبكام
وانا قلبى ماكان عمرة حويــــــــــط

امبارح بتقـــــــــشّر كوسه
قلت لها ياطعمه ياننوســـــه
البيت فاضى وعايز بوسه
ترد تقول هـــــــــــــو انت عبيـــــــط

بوسة ايه يابو بوسه اتنيًل
اصـــــــــبر لما الدنيا تليًل
حملك مش سـهل ولا قليًل
اهمد بقى وبلاش تنـــــــــــــــــــطيط

انا مش بوستك من ســنتين
بعد ما ابوك مات له بشهرين
بأمارة وكان يــــوم اتنين
انت ... ده انت يالهوى غويـــــــط

قلت لها ياوليه القــــــــــــــــــــلب
مهما يشيل ويشـــــــوف م الغـلب
عمره ف لحظه ما ينســـى الحب
مهما حياته تكــــــــــون لخابيـــــــط

حبك بقى فالصو بقى صورى
واقف زى اللقمه ف زورى
شـــرطه عليّا احبك فورى
وحبك ليا يكون تقســــــــــــــــــــيط

إيه اللى غاصبنى ياعم الحاج

حلوة
بس ليلتك سودة لو المدام قريتها

زجلية جميلة وخفيفة الظل
أحسنت ياأستاذ محمود
تقبل مروري وتحياتي

الاستاذ / عبد التواب الرفاعى
بشكرك على رايك فى القصيدة وماتخفش المدام سمعتها والحمد لله ربنا ستر
تحياتى لحضرتك

شكرا جدا يا استاذ عادل عوض
على رأيك فى القصيدة وفيا
وردك بالشعر كان اجمل من المكتوب منى
تحياتى لحضرتك

الشاعر الجميل استاذ / حسن الجمال
بشكرك جدا على مرورك ورأيك اللى بعتز بيه جدا
محمود

لأول مرة أقرأ لك شاعرنا
و لكنها لن تكون الأخيرة
تحياااااااتي

الاستاذ محمد عبد العزيز
بشكرك على ثقتك الغالية واتمنى اكون عند حسن ظنك دائما
ارجو قبول تحياتى