ألف نيلة ونيلة

احكي يا شهرزاد

احكي لشهريار

ع الشعب اللي ثار

ضد الزور والفساد


احكي ع البلاد

ورئيسها الألعبان

اللي سرق وخان

وباعها فى المزاد


أحكي ع الولاد

نزلوا فى الميدان

ورد وسط النيران

ما خافوش م الزناد

أحكي عن العناد

وفرعون اللي شاب

لما قتل فى الشباب

بالظلم وبالعناد


أحكي ع الشداد

شباب مصر الجدع

اللي عمل فيها البدع

وقضي ع الاستبداد


أحكي للجلاد

السجن فيه سلطان

القصر فيه اخوان

كده من غير ميعاد


أحكي عن الأسياد

عن مبارك الفرعون

عن معمر المجنون

وصالح بني حداد


أحكي يا شهرزاد

عن بشار الحمار

وبن على المكار

وعن أيام السواد


أحكي عن الولاد

عن السمر الشداد

أجداد فى روح جداد

روح كانت جماد


أحكي عن الرماد

اللي بقت لهيب ونار

عن الاحرار والثوار

وعن خير البلاد


عن النور اللي عاد

بعد سنين الظلام

فى الجهل والحرام

وعن الحق الل عاد


أحكي عن الاحقاد

فى الفن والاعلام

فى الحبر والاقلام

حان وقت السداد


قالت شهرزاد

مولاي لاح النهار

"مسرور" قال شهريار

ثم الصمت ساد