دوام الحال من المحال

على مرعصور وأجيال
تلاقيهم فى كل مجال
عاملين رجال أعمال
مايعبدوش غير المال
طالعين واكلين
نازلين واكلين
لاملة عندهم ولادين
مش بس شيوخ منصر
دول ولاد شياطين
سحقة مش منشار
وأكلتهم كفيار
الرحمة والإنسانية
مالهمش إعتبار
فئة من الرمم
بيفسدوا الذمم
ويسمموا الأفكار
وياما ضيعوا أمم
بيسدوا عين الكبار
ويمصوا دم الصغار
شريحة ملعوب فى أساسها
تاكل أهلها وناسها
شوية يلعبوا ف البورصة
وشوية فى الدولار
التجارة عندهم فرصة
وغش وإحتكار
فاكرين نفسهم شطار
وغيرهم ماعندوش أفكار
مع إن أى حمار.....
لو باع ذمته مش حا يحتار
فى اللى هما عاملينه
واللى هما فاهمينه
سبحان العزيز الجبار
اللى هما ناسيينه

غلطان ومخه تعبان
اللى فاكرها هوجة شبان
تهدأ ويطويها النسيان
وحا نرجع للى فات
الثورة لها بدايات
ونهاية وتشطيبات
ياريت تفهموا الحكاية
وتبطلوا إستعباط
موجة وراها موجات
وكلها مقدمات
لحد ماتلاقوا تسونامى
ينهى كل الحكايات
ده مرار وقهر سنين
ودم شهداء ومصابين
لو لسه مش فاهمين
إقروا التاريخ ياباشوات

ومن افسد المجتمع غيرهم بطمعهم وجشعهم ؟؟

اخى الشاعر د / مراد سليمان

دائماّ اغبى الناس من يعتقد انه اذكاهم .

لكن ازعم ان الآتى خير إن شاء الله .

مودتى وتحيتى ...

الشاعر الدكتور مراد سليمان..قصيدة كاشفة فاضحة لعيّنة من الذين عاثوا في الأرض فساداً وإفساداً لعقود طويلة ومازالو للأسف حتّى الآن كما هُم.. ولم يلتفت إليهم أحد .
حفظ الله مصر من شياطين الخَراب وتُجّار الأوطان.
دُمت مُبدعاً يا شاعرنا

أخى الشاعر الدكتور مراد بك سليمان

شرفنى أن أقرأ لأول مره عمل من أعمالك الأدبية

وسعيد بذلك ويسعدنى أكتر لقاؤك إن شاء الله فى

الندوة القادمة لأتشرف بمعرفتك عن قُرب .

عمل شرحت فيه باستفاضاه من هم الذين أفسدوا

علينا حياتنا ، لانقول سوى .. سامحهم الله .

تقبل تحياتى واحترامى .