ليه ضيعت العمر معاكوا؟ طارق منيب

بنت في يوم كانت أحلامي
فجأة لقيت الحلم كابوس
قامت غارت من قدامي
قمت لقيت الدنيا فانوس
بعد ماكان النور بيضلم
كان الحب فـ قلبي معلم
طب مافـ داهية الحب وأنتي
ده أنت خسارة بطعم الفوز

صاحبي وفاكر أنه صديق
فجأه لمحته فـ وسط طريق
يشتم فيا ويخدع فيا
حقده يكفي الدنيا تضيق
وأنا مخدوع إننا أصحاب
قمت بسرعة فتحت الباب
أطلع برا مانتش صاحبي
أنت في سكة وأنا فـ طريق

كنت بافكر أرضي فـ ربي
قلت قريبي كمان من رحمي
لازم أوصل بيني وبينه
لازم احيطه بعطفي وحبي
كلب وكل مايكبر سنه
ينهش يخدش ناسه ولحمه
قلت الضفر ده لازم خلعه
لجل اللحم ماينضف منه

جاري وقلت الجيرة دي حق
أصل نبينا وصانا بيها
فجأة لقيته فـ لحظة اتزق
يشعل فتنة يكوينا بيها
أصل النار دي حياته وهمه
إزاي يحرق فينا يكوينا
قلتله أنزل ده أنا راح أعزل
لجل ماشوفك تاني جنبينا

ليه ضيعت العمر معاكوا؟
ليه فكرت إن أنتوا صحابي؟
ده أنتوا الدنيا وحشة معاكوا
ولا تستاهلوا حتى عتابي
عشت أفكر.. أني أفسر
ليه الغدر رفيق أحبابي!
والقى الدنيا جميله بدونكوا
لما تغوروا من قدامي
............................

قصيدة ناتجه عن جرح .

جرح الحبيب لو كان خربوش

بيبقى صعب ولا نطيقهوش

اما الغريب لو جرحه غويط

ويشر دم ما بنحسوش

مودتى وتحيتى ...

عمي عدولة

نقص الخبرة بيكلف الواحد كتير

وبعد الواحد مايكبر ويكتسب الخبرة

يقول ياريت كان عندي نفس الخبرة

اللي باملكها دلوقت

مودتي ياأستاذي

وكنت تجنبت اللي حصل

ولكن الحمد لله على كل حال

لقطات جميله التقطتها عين شاعر وعبرت عنها بايجاز متمكن
كل مقطوعه تكشف لمحه وتعالج قضيه اجتماعيه نشعرها جميعا بسلاسه وعفويه جملت النص
تحياتى اخى العزيز واحترامى

الأستاذ/ رأفت المصري

السلام عليكم

مشتاقلك ومشتاق لتعليقاتك الجميلة

وقد وصلتك القصيدة بكل ماقصت

ولكن يمكنني أن أضيف..

كنت أبحث عن الخير

فلم أجد إلا الشر

والحمد لله

خالص مودتي وتقديري