مشروع النَهضَة الأسطوري !!! إلى روح الثورة المصريّة

أنا مش باتّريق عـ النّهضَةْ

ولا بارمي كلامْ

ولا باكتب علشان الشُهرَةْ

دا الكدب حرَامْ

ولا غاوي مشاكل ومُنَاهدةْ

ولا ناوي خِصَامْ

أنا بس باقول اللّي فـ قلبي

علشان حسيّتْ

إنّ اللّي هيكدب ويخَبّي

هيهدّ البيتْ

والذنب ياعالم مش ذنبي

أنا ياما قاسيتْ

من ظُلم مُبارك وحكُومتُهْ

والسّت سوزانْ

هوّة اللّي يطالب بكرامتُهْ

خاين وجبانْ ؟؟!!

ولاّ انتوا عشان اتحكّمتوا

سَلَفي.. وإخوانْ

هتصادروا آرائنا وأفكارنا

وتسقونا الويلْ!!!

وشيوخ.. بالفتوى تكَفّرنا

بصُراخ وعويلْ!!!

لومش عاجباكم أشعارنَا

ما تشوفوا بديلْ

يكتب على كيفكم وهواكمْ

شعر التهليلْ

الرّك ياشَعب على النيّـةْ

وانا قاصد خيرْ

وباقول إحساسي بشفَافيّةْ

من غير تزويرْ

فين طرح النّهضَة الخُرافيّة

فين التغييرْ؟؟!!

*************************

النّهضَة اللّي احنا اخترناهَا

وخسرنا كتير....وكسبناهَا

الحزب الحاكم.. بسلامتُهْ

مَقدرشي.. يفسّر معناهَا

مشروع النّهضَة الأسطورةْ

هيكـون في الآخر.. فـزّورةْ

مرسومة بأ فكار الشاطرْ

والريّس ظاهر في الصّورةْ

النّهضَة يا عالم محتارةْ

بتصيد الحلم.. بسنّارةْ

وتبيع الوهم في أسواقنَا

وبتغزل بالفتوى.. ستارةْ

النهضة بتحلب بَـقـرتـنَـا

وبتحصد في الغيط زَرعتنَا

أنيابها بتغرز في عروقنَـا

وتمُصْ عَـرَقنا.. وقـوّتنَـا

النهضة بتهتف....ألاؤنَـا

وبتفرض عـ الشعب معونَةْ

وبتشحت مـ البنك الدّولي

وتجهّز للثورة (صـابونةْ)

النهضة بتعشق أمريكا

وتفصّل قوانين.. أنتيكا

وبتقفل دكاكين ومطاعم

وبتمحي الرزق بأستيكا

النهضة بتكدب..وتصدّقْ

بكلامها الحلو..المتذوّقْ

فرحانة بمنصب وكراسي

قال يعني الحلم بيتحقّقْ

النهضة أروبة ومن يومهَا

بتحب التغيـير في هدومهَا

تتلون ...زي الحربايّةْ

مين اللّي هيقدر يفهمهَا

النهضّة بتفتَح في جرابهَا

وبتجمَع مـ النّاس ضرايبهَا

وتمد إيديها على جيوبنَا

علشان ما نحِسّش بعيوبهَا

النّهضّة بتقتل في عيالنَا

على باب القَصر بتسحَلنَـا

وبتعمل تحقيق ومحاضِرْ

وتغَـيّر حَتّى في أقـوالنَـا

النَهضَة بتسرق شُهدائنَا

وبتجري بسرعة وتسبقنَا

وتروح للقاضي وتشكينَا

ومَحدّش راضي يصَدّقـنَا

دستور يا بتوع الحُريّةْ

رافضين الدّولة المدنيّةْ

قسّمتـوا بلدنا وبعتوهَا

وكسرتوا الروح الثوريّةْ

أختي الحبيبة الشاعرة الجميلة..سلوى سيد عبدالعزيز..تسلمي يارب من كُل شر..وبعدين آدينا بنعبّر عن اللّي جوانا يمكن نرتاح قبل ما يحاكمونا على الكلمة وإبداء الرأي ويصبح الإبداع جريمة يحاسب عليها القانون..
دُمتِ بكل الخير والسعادة

صديقي العزيز الشاعر محمود بسيوني..أشكرك على مرورك وتعقيبك الجميل ونصيحتك الغاليّة...
دُمت مُنصفاً واسع الأُفق ذو رأي رشيد..يا.....شاااعر

أستاذي الشاعر الكبير قدراً ومقاماً وإبداعاً عاطف الجندي..لا فُض فوك فقد إختصرت كلاماً كثيراً بتعقيبك الراقي وكلماتك المُعبّرة..أشكرك على نظرتك العميقة ورؤيتك الثاقبة وحكمتك البالغة وفصاحتك المعهودة.
دُمت بخير يا أستاذي

عَمّي وأستاذي الشاعر الكبير قدراً ومقاماً الأستاذ محمد البهنساوي..فَرّج الله هَمّك.. وأزاح كربك.. وأبلغك حاجتَك ..فقد أشعرتني بتعقيبك أن الدنيا ما تزال بخير وأن البشر ما زال فيهم من يحترمون الفكر والإبداع وحريّة التعبير..جزاكم الله خيراً يا أستاذنا

أستاذي الشاعر المُبدع الكبير الأستاذ عادل عوض سند..أشكرك لمرورك الراقي وتعقيبك الجميل وأضم صوتي إلى صوتك مُبتهلاً إلى المولى عز وجل أن يقينا شر الكذب والنفاق والرياء وأن يُثبّتنا على قول الحق أبداً ما حيينا..
تحياااتي يا أستاذي