صوابع روج

خبط القطر في الأتوبيس
لازمتها أيه السبب مين
معقول على حبة كراريس
نخسر حكومة موحدين
****
وحد الله يا مسلم
وبلاش تزيد م الفتنه
دا مجرد أتوبيس وقطر
مش حريقه جوا بيتنا
****
أوع تصدق إلِ يقول
أطفال ماتت وأشلاء
الكلام ده مش معقول
ولو حقيقي يبقى ابتلاء
****
أوع تصدق إلِ يقول
شفت طفل ومن غير راس
لو أبوه يبقى فلول
وابن كلب كمان هلاس
****
شعبنا أصله عبيط وطيب
بيصدق إعلام دمرنا
بيعرض لينا صوابع روج
على إنها أشلاء أطفالنا
****
الحكومة دي ناس رجالة
أولهم دكتور قنديل
دمعت عينه يا عيني محالة
تقدر تمحيها المناديل
****
شفت دموعة وهو بيبكي
على أطفال أرض فلسطين
طب شوفت الجود وهو بيدي
ضحايا أسيوط تعويض ملايين
****
وكمان هيرجع المصاريف
إلِ اندفعت للكراريس
والخياط والخياطة
والمدرسة والأتوبيس
****
وإلِ مات له كوم أطفال
كان إهماله مش إهمالنا
ساب البيض كله في سلة
ولا صدقش كلام أمثالنا
****
وممكن يبقى عقاب من ربه
على صوته إلِ إداه لحمدين
أسي وظالم جاحد قلبه
راح صوت لخلاف الدين
****
خبط القطر في الأتوبيس
لازمتها أيه السبب مين
معقول على حبة كراريس
نخسر حكومة موحدين

وليد الوصيف