من غير دليلْ....

بيقولوا قاضي المحكمة.. محتاج دليلْ

والحكم من غير الورق..شيئ مُستحيلْ

لو كنت مش قادر تشوف.. مين المُدانْ

إسأل ياقاضي المحكمة..أرض الميدانْ

هيّة اللّي كانت عـ الخَبَر شاهد عيانْ

شوف الجرايد..والصّورْ

آدي الحُصان..وآدي الجَمَلْ

وآدي الشهيد.... اللّي اتقتلْ

ـــ غرقان في دَمّه ـــ

والشباب.. شايلينُه شيلْ..

يا قلب أُمّه اللّي انفَطَر..من يوم ما ماتْ..

وعيونها دبلت مـ السهرْ..

بين الصّور...والذكرياتْ

والُحزن ليل.. قاسي وطويلْ

والضحكة في وشوش البَشَرْ ماتت خلاصْ

ما يهمّناش...غير العدالة.. والقَصَاصْ

ـــ ومفيش بديلْ ـــ

لسّاك يا قاضي المحكمة عاوز دليلْ ؟؟؟؟

مستنّي إيه...؟؟؟

من تحقيقات..مكتوبة بإيدين الجُناهْ

والعسكري بيفتح طريق..

والمُجرمين..واقفين وراهْ..

والحق مغصوب عـ السكُـوت...

والظلم بالغ مُنتهاااهْ

لمّا الرويني..يقول كلام بالكدب..وانتّ تصدّقُهْ

والشاهد العَدل الأمين...

هوّة اللّي خاين.. أو عميلْ !!!!!!

يبقى إنتّ مش محتاج دليلْ