من وحى العدم والموسيقى

(1)



كلام الروح

رسايل من موسيقى القلب

وتسبيح الجسد للموت



..



كلام الموت

رسايل من موسيقى الروح

وتسبيح العدم لله



..



كلام الله

وطن بيحب إحساس الشقا

ف الأرض



(2)



هقتلها بكل ساديَّه

وافوز باللحظه



(3)



حتى الدعا

ممكن يذل المؤمنين



(4)



بدمعة ملاك

وانتصار عسكرى

مسافر

ف كام رحله أبعد من الذكريات

اللى كل امَّا ترجع

تعد الحوارى

وتمحى ف ضلوعى أسامى البنات

وعدُّوده باسم الوطن

والموسيقى



(5)



يا بلادى

يا سبيل الذات ف إنكار المعانى

تسمحيلى لو بطلَّه

من شوارعها العتيقه

للفراغ

جنيِّة الأحلام

بتقطف بسكويت العيد

من الموسم

ومن أرحام بنات الليل

بنطفه جديده خالص

مش شبهنا

يبقى أحسن لو لضمنا ف بعض

بخيوط التلاشى



(6)



حبَّه حبَّه

تندفن جوايا صورتى

والجراح المستحبَّه



(7)



(رجل الأرنب

أسرع من دقة مرزبَّه)



ولو حبِّيتى

ممكن اقوللك على أسرار الدنيا

ان شالله عجين الفلاحه

ونوم العازب

بس الأسلم

إن احنا نكمِّل بكره

عشان الوقت اتأخر

وملاك النوم

بيصفَّر زى المحولجيَّه

على شريط القطر

(من بعد ما كسَّر رجل الأرنب)



(



شطرين كمان

وتموت قصيده جديده

كنت بـــ ـحـــ ـبَّـــ ـهــ ــا



(9)



وبعد ما مات

رسم ورق الخريف ضله

وكان فرحان بيتبسِّم بكل دفاه

ومعرفش ان قلبه دعاء

ف جسم غريب وروح تانيه

فمات كافر



(10)



يا دفتر الأيام

يا ابو المواليد

ياللى بتحصد كل يوم إسمها

جاتلك بسرعه

اتنبِّهتلك ... مشيت

شايل سجلات القرف والنكد

وهربت تتحنجل كما المطاريد

الدمعه صاحيه

والنفوس بايشه

بـ رجوله مانعه الشمس برجوله

وبتحضن البنت

اللى مش عايشه

فيعلِّموا حتى الغياب الغياب

ويحوِّلوا كل الأماكن

قبر



(11)



مجنون بضحك الغجر وبالنهود البكر

وبالخيال لو فَجَر ف كل لحظة فكر

كل الخيال بيموت ف السِّر وافضل أنا

رب العدم والموسيقى وتمتمات الذكر

كنتُ هنا

شطرين كمان

وتموت قصيده جديده

كنت بـــ ـحـــ ـبَّـــ ـهــ ــا


روح يا شيخ يخرب بيت اللي جابوا أبو شِعرك


وبعد الشر ع القصيدة اللي بتحبها


____________

مررت من هنا ويا ريتني ما مررت

عقدتني

كلام جميل
وكلام معسول
مقدرشى اقول حاجه عنه

عاطف عبدالعزيز الحناوي كتب:

كنتُ هنا

أشكرك بشده على مرورك

عادل عوض سند كتب:

مجنون بضحك الغجر وبالنهود البكر

وبالخيال لو فَجَر ف كل لحظة فكر

كل الخيال بيموت ف السِّر وافضل أنا

رب العدم والموسيقى وتمتمات الذكر

خير اختتاميه . وتسجيل لاعجابى بحرفك .

مودتى وتحيتى ...

شكرى ومحبتى لك يا أستاذ عادل

نجم في طبق- مجنون أمنية كتب:

شطرين كمان

وتموت قصيده جديده

كنت بـــ ـحـــ ـبَّـــ ـهــ ــا


روح يا شيخ يخرب بيت اللي جابوا أبو شِعرك


وبعد الشر ع القصيدة اللي بتحبها


____________

مررت من هنا ويا ريتني ما مررت

عقدتني

أنا برئ والمصحف ما عملتش حاجه
ههههههههههههههههههههه
الله يخليك يا ريس

م/عطية شواش كتب:

عقده فلسفيه ليس لها غير مجنون ... او شاعر

تحياتي ياشاعر

نلتقي حين تنمو البصيلات علي اوردة النهر

تحياتى ليك يا أستاذ عطيه ... واحشنى جداًَ
وأشكرك على تثبيت القصيده

حسن الجمال. كتب:

الجميل اسامة سند
اعجبتنى موسيقاك وسباحتك على بحور الشعر
كل عام وانت بخير
تحياتى

أشكرك على جمال تعليقك يا أستاذ حسن

عبد التواب الرفاعى كتب:

كلام جميل
وكلام معسول
مقدرشى اقول حاجه عنه

لا تقدر تقول اللى انت عاوزه يا أستاذ عبد التواب .. أشكرك على مرورك