خارميون

كنتى ماشيه ف الشارع

تتفرجى ع الأشكال الغريبه

والأماكن الغريبه

وكنتى واثقه من نفسك

لدرجة انك افتكرتى انك شبه خارميون

وهيا طالعه تتزنق فى الأتوبيسات

بتدوّر

على التعبان اللى مش عايز يعض كليوباترا

خدتى نفس

وافتكرتى اهم حاجه

انك النهارده عندك معاد

مع اوكتافيان

ومعايا

بس انتى نسيتيه

وافتكرتى شكلى

حاسبى

وانتى بتخبطى ع الباب

لأن عقارب الساعه واقفه وراه

بتحاول تعاقبك على تأخيرك

وانا جاى

وببص م العين السحريه

ومش مهتم اعرف

اذا كانت عوره والا لأ

لكن فى حاجه بجد قلقانى

انك من كتر ما وقفتى ع الأبواب

اتعودتى تقفى بره

وبقيتى تخافى

من تجربة اليس فى بلاد العجايب

وتجربة اليس مونرو

قبل ما تاخد نوبل

وتجربتى

قبل ما اخد بالى انك موجوده

طب عايز اسألك سؤال

هوا انتى ليه دايما متعلقه ف هوامش البنات ؟

وخصوصا اللى بيحكموا العالم

طب بصى كده من الشباك

فى ولد ملامحه عربيه

من الطبقه الدنيا ف تصنيف هيرودوت

بيبص عليكى

وكأنه عايز يخطفك على حصان منلايوس

متحسيش ان فى تناقض فى الموضوع

لأن الشاعر اللى كتب النص

قاصد يلخبط الناس

عشان يظهر فى صورة الفيلسوف

اللى عنده رؤيه مختلفه

هيا كده قصيدة النثر

بقت عباره عن جمل هنا وهناك

ملهاش دعوه ببعضها

الولد الصغير مسك الكيبورد

وبقى بيكتّر من اللاوعى

عشان كده

انا وانتى اتحولنا لشخصيات وهميه

وشخصيات تاريخيه احيانا

لكن مهما كنا احنا ايه

الحاجه الوحيده اللى اقدر اقولهالك

انك وصيفه بالنسبه لكل الناس

لكن بالنسبه لى

انتى اجمل من ميت كليوباترا !

أسامة الجميل
سعيد بمقابلتى معك فى الفيوم
تعرفت على شاب متقد الذهن
ينتظرك مستقبل جميل فى الشعر
شريطة الإخلاص له
دمت جميلا كما هنا

عادل عوض سند كتب:

الابن الشاعر

اسامه سند

اظن خارميون هى اقرب النساء الى كليوباترا .

وكانت تضع ثقتها الكاملة فيها . وكانت الوصيفه المقربه لها .

وانت كتبت :

أن الشاعر اللى كتب النص

قاصد يلخبط الناس

عشان يظهر فى صورة الفيلسوف

اللى عنده رؤيه مختلفه ...

وهذه هى رؤيتك .

مودتى وتحيتى ...

شكراً يا أستاذ عادل .. أظن إن الشاعر اللى معندوش رؤيه مختلفه ومشروع خاص بيه يبقى كمالة عدد .. وانا مش بحب ابقى كمالة عدد .. أهم ملامح مشروعى ف الشعر إنى أخلق أسطوره خاصه بيا ممكن أتناص معاها بعد كده .. مش إنى أنحت أسطوره والعب عليها .. خارميون بالنسبه لى مش خارميون وصيفة كليوباترا .. حتى كليوباترا نفسها متعددة الدلالات .. مش كليوباترا السابعه ملكة مصر .. وده عنصر الخلق وهيا دى فعلاً رؤيتى .. أهنئك مره أخرى على ديووانك الجديد .. مبروك

عاطف الجندى كتب:

أسامة الجميل
سعيد بمقابلتى معك فى الفيوم
تعرفت على شاب متقد الذهن
ينتظرك مستقبل جميل فى الشعر
شريطة الإخلاص له
دمت جميلا كما هنا

شكراً يا أستاذ عاطف
وأنا كنت سعيد بمقابلتك
فلقد تعرفت على رجل فاضل

اسامة حبيبي كيف حالك
أسمحلي أثور على عملك وأطالب بنقلة
أكيد مكنتش تقصد تحطة في منتدا العامية أو أنا الذي أصبحت لا أُحسن تزوق الشعر عموماً هي وجهة نظر أردت أن أجر شكلك بها فقط
تقبل مروري

مسترعطيه كتب:

تحيه ومن بعد السلام
الحب والتقدير والاحترام
لاستاذنا عاطف
واخوه سند الهمام
بتمدحوا سمسم
مش عاوزه مدح
اصل ابن الوز عوَّام

لك الشكر يا أستاذ عطيه .. لكنى لست أبناً للأستاذ عادل سند وأنا ليا الشرف طبعاً .. فالأستاذ عادل من الشخصيات الجميله التى أحبها وإن كنت لم أشرف بلقاءه حتى الآن

محمود بسيوني كتب:

اسامة حبيبي كيف حالك
أسمحلي أثور على عملك وأطالب بنقلة
أكيد مكنتش تقصد تحطة في منتدا العامية أو أنا الذي أصبحت لا أُحسن تزوق الشعر عموماً هي وجهة نظر أردت أن أجر شكلك بها فقط
تقبل مروري

ههههههههههههههههههههه .. ماشى يا محمود .. عموماً ملاحظتك صحيحه يا صديقى .. قصيدتى نثريه وانا غلطت وحطيتها ف منتدى التفعيله بحكم العاده .. يالله مش مشكله .. أهى خدت نصيبها وتعليقاتها وسلطاتها كمان .. مساء الفل يا صديقى

محمود جمعة كتب:

الجميل الشاعر اسامة سند

معروف عني في المنتدي أني لا أقبل كلمة ( قصيدة ) علي النثر ،، رغم

ما ستقوله من أنه أتجاه ادبي له رواده وكتابه ومعجبيه ولكني سأظل انا

معتقدا ان كلمة قصيدة تتنافي تماما مع كلمة نثر ،،

ومع ذلك أقول أنك لملمت ثقافاتك وقراءاتك لتخرج لنا اسقاطات مزجت بين

كيلوباترا والاتوبيس ،، وخلط الخيال في اليس بالواقع في مونرو ،،ثم

ادخال اللاوعي الي تحولات التاريخ .. وهي فلسفتك الخاصة دائما

في أستدعاء الشخوص الحقيقة او الادبية او مزج الفلسفي بالصياغة

الشعرية .. وكثيرا ما تنجح في صناعة الدهشة ،،وتملي علينا اسلوبا اسمه

أسامة سند ،،وهذا نجاحا في حد ذاته

المهم لو قرأتها لك بالتفعيلة سأكون أكثر سعادة

خالص تحياتي وأمنياتي

أشكرك يا أستاذ محمود .. ده كلام كبير عليا أوى .. أنا على فكره مش من هواة النثر حتى على المستوى التنظيرى .. من الحديث عن اليومى واالمعاش والتفكيك واللاهويه .. أنا تفعيلى حتى النخاع ومؤمن جداً بالقضايا الكبرى .. الأديان والوطن والمعاملات الإجتماعيه .. لكن أنا عندى الأيام دى رفاهية كتابة النثر لأنى فرغت من مراجعة ديوانى وهو على مشارف المطبعه .. ديوان تفعيلى