التوهة

في ناس صاحية
وناس سارحة
وناس جاية
وناس رايحة
وناس شاردة
وناس واضحة
وناس بتئن
ولما تكبر الصورة ..........
وتعمل زووووووم على عيونهم
تلاقى الكيل صبح طافح
وهم الناس عليها تقيل
فبشغل نفسى في المواويل
واغنى ياعين اغنى ياليل
الاقى الكلمة في جوفى بقت ..................
مرة
وبالمرة
تفر الدمعة من عينى على خدى
واصرخ امتة تتهدى
تجر السيل
وبالى طويل
على الاحوال وع التخبيط
وع الناس اللى غاوية تظيط
تحب الجرى والتنطيط
ساعات بتقولى ياطيب
وياما تقول عليا حاويط
وبينهم احس بالتوهة
وبالغربة في قلب البيت
ولما تقرب الصورة
تشوف متاهات
وناس مشغولة في الحسابات

تشوف البيه
تقولى وطنى وابن اصول
وناس تانية تقول ده فلول
وصورة عرضها بالطول
واشى سلفى

واخوانى
وليبرالى
وعلمانى
وعسكر ويا حرامية

وناس بتموت مفيش دية
وناس بتنادى مدنية
وانا في الزحمة دى تعبان
بقول ياميدان

شعارك فين
مفيش تغيير
وفين العدل ياتحرير
وفى التقرير..............

بيبقى الجانى مجنى عليه
ولما اتجرء اسال ليه
يرد البيه
متسالش
وكلمة ليه متتقلش
واتوه تانى
كانى مصرى تايوانى
اااااااااااهين يااااااااااااااااانى
عليكى يامصر
هصلى العصر

وادعيلك
تحياتى عبدالعزيز خطاب

الشاعر الرائع

عبد العزيز خطاب

نص جميل بما يحتوى من موضوع وسرد ووزن .

وحرفيه واضحه ومتمكنه اضاءت حجرة الرؤيا لدى القاريء

ونص غير مفتعل وبدون جلبه شعريه وسلس للغايه .

احييك على جمال ما ابدعت وطرحت .

مودتى وتحيتى ...