أخرس فى ميدان التحرير

أخرس فى ميدان التحرير )
نفسى أهتف مع خواتى بس اللسان محبوس
مع انىّ أطرش لكن صوت الضمير محسوس
عوّضنى ربىّ بدل صوتى بعنيّه
وادّانى حاسّة سمع فى القلب مخفيّه
عاملت كل البشر بالصدق فى النيّه
صحْيت عنيّه على ثورة لخلع دروس
,,,,,
لا سمعت مرّه خبر ولا مرّه قولت كلام
لاعاتبت يوم القدر ولا النصيب يتلام
مانا عمرى عايش صنم وايديّا بتشاور
وان مرّه شوفت الغلط مع نفسى باتشاور
وناس عيونهم عليه وايديها ماتشاور
وناس تشاور تقول ارحل كفايا آلام
,,,,,
حسّيت بصوتى طلع من فرحتى بيكم
وصوتكوا ليّه اتسمع من نظره لعنيكم
خدونى جوّه الميدان لو ح اشتغل كناس
ادّونى لحظة امل دانا قلبى فيه احساس
أخرس عايش وسطكم طافح كتير م الكاس
وعنيّه تلمح ناس برصاصها ترميكم
,,,,,