حالــنا وحـــالك !!!

أنتى اللى راسك مرفوعة
واحنا راسنا في الطين
انتى اللى لو موجوعة
نسهر نداويلك جرح السنين
انتي الزحمة فى عز السكات
انتى الهوا محبوس فى الزنزانات
انتي القلل مرصوصة في البلكونات
انتي الخضار وغناوي البنات
انتي الدفا في عز البرد
انتي اللي مفيش زيك حد
انتي اللي دايما صابرة بتنسى المذلة
والاقي الشمس فوق جبينك طالة
تقابليني بضحكة فوق شفايفك هاله
تخدينى في حضنك وتضميني ضمة
وافرح بيكى فرحة طفل بلعبة جديدة
وف لحظة الاقيكي بقيتي بعيدة
قلبك يقسى ومعاملتك تبقى شديدة
وترجعى من تاني تطبطبي وتضمي
اهو هو ده حالنا معاكي ياامي
هى دى اصول اللعبة
ولا انتى معانا بتخمي
البنت ابيض شعرها السايب
والولد مبيقشش ولا لاحق نايب
راحت خلاص على كل كروتك
لا بنت ولا ولد ولا حتى شايب
عجبك حالنا كده فرحانة
ردي علينا ,قولي بأمانة
ساكتة ليه ولا انتي فينا شمتانة
مهما تعملى فينا هنفضل مستحملين
مهما تعملي فينا مش هنكون برده عاقين
وهنحبك لان الحب مش بإختيارنا
حبك بيجري في عروقنا وده قدرنا

_____________
لو سمحتوا ياشعراءنا العظماء .. ممكن تقولوا ملاحطتكوا
وايه الحوادث فى قصيدتى .. عشان انا نفسى اتعلم منكوا ومتقلقوش انا تلميذة ذكية ولماحة وبلقط بسرعة

جميل ياساره ..

النص ده اجمل من السابق .. وشايفك على الطريق جايه .

بصى .. من تملك الاذن الموسيقيه تملك الوزن ..

وانتى لاينقصك للكمال إلا بعض الخطوات السهله .

ياللا .. ومنتظرينك فى نص مكتمل ..

تسلمى والله ينور ..