رباعيات أبو عدنان

رباعيات أبوعدنان

(1)
يا أيها القلب الذى كترت شطاحاته
يشطح وينطح تملى مغلوطة حساباته
اهمد شوية بقى كتر الغرام غلطة
أتارينى بدّن ف مالطة واللى اختشوا ماتوا


(2)
مبروم على مبروم أبدا ما يبرمشى
وأنا كنت فاكرها إنها هتميل مع رمشى
أتاريها راسية قوى وطلعت خبيرة غرام
قلتلها قلبى استوى قالت ميحكمشى



(3)
قالت : مهما الدنيا تفرق بينى وبينك أبدا أبدا مش هنساك
قالت : لو راح أكلها بدقة لو راح أموت قلبى قلبى وعمرى وروحى فداك
بص ف عينها طار م الفرحة وبصوت عالى قال : يعنى أنتى معايا بجد ؟!
قالت : طبعا بس بشرط هات الأول كل فلوسى اللى معاك


(4)
عجبى عليك يا زمن .. حالف لتقتلنى
إن يوم أحس بهنا .. ألقاك قصاد منى
شاهر سيوف الغضب ومعلق المشنقة
بكفاية قسوة بقى وارحم صغر سنى



(5)
يا ضحكة بكرة فين أنتى ؟ وليه رافضة تصالحينى ؟
وليه راضية بأوجاعى وتحلالك دموع عينى
يا ضحكة بكرة لو زعلانة أنا غلطان وأنا أسف
ما عدتش تانى هعملها ، فهل ممكن تسامحينى ؟!



(6)
قلبى الطيب مبقاش طيب علشان يسمع تانى كلامك
قلبى اتعلم إزاى يظلم وإزاى يبقى عنيد قدامك
والخدام اللى بيهواكى ملّ هواكى وحس بظلمك
مش هرجعلك ولا هسمعلك أنا مش عايز اكون خدامك
(7)
زمان الحب علمنى مكونش جبان
وما ازعلشى ولا ابكى على اللى كان
لكن من يوم ماحبيتك بقيت خايف
تفوت لحظة ماأشوفش جمالك الفتّان


(8 )
لما تحس إنك مضايق قول ياااااااااا رب
ارفع إيدك وأطلب منه يــــــــزول الكرب
مهما تحس بظلم وقسوة أوعى تخاف
ربك طيبة، ربك رحمة ، ربك حُــــــــــب



(9)
يا ورد مين علّمك إنك تكون جارح
والحب عود دبلان والجرح عود طارح
يا ورد ليه الطرح دايما أسى ودموع
وإن جانى يوم الفرح ألقاه كان امبارح