ولا غنا ولا صيت .. هدية للاستاذ عطية شواش

ولا غنا ولا صيت

دا الشعر عبيط

لا بيفتح باب

ماشي بقبقاب

من جنب الحيط

ولا غنا ولا صيت

دا الشعر حويط

بيقول : ياكلام

اخرك حتنام

زي الفتافيت

ولا غنا ولا صيت

دا الشعر غبيط

شايل احلام

بيدور ع اللي ياخدها بكام

ويبيع تقسيط

ولا غنا ولا صيت

دا الشعر سميط

ملح وكمون

وبعيد ع الجون

عامل شويط

ولا غنا ولا صيت

دا الشعر صويت

علي واحد مات

واحنا الاموات

زي الكبريت

ولا غنا ولا صيت

دا الشعر بسيط

ابسط م الجيــــــــ ..

ابسط م اللمس وم التحسيس

علي اي شريط

ولا غنا ولا صيت

دا الشعر سليط

بيشك ف ابره ف قلب الخيط

وينقر ع الباب العالي

نضطر نلمه ولا الكتاكيت

ولا غنا ولا صيت

دا الشعر نبيت

يسكرنا فنبقا ولا المساخيط

وتهيس ولا اجدع عنتر

وتقوم الصبح تكون بليت

ولا غنا ولا صيت

دا الشعر بيملا الجردل زيت

وبيرسم مكه واهل البيت

فتبوس العالم ضهر ايديك

علشان حجيت

ولا غنا ولا صيت

بالشعر قويت

فضربت دماغي في اقرب حيط

ومحدش بص علي الشخابيط

بالشعر بكيت

ولا غنا ولا صيت

دا الشعر أليط

مايحبش حد يعدل بيت

ويصحح ليه

غير لما ايديه

تغرق في الزيت

ولا غنا ولا صيت

دا الشعر شريط

علي طوله حكيت

محروقه الشاشه

لو استعميت

ولا غنا ولا صيت

بالشعر هويت

حبيت العالم واتحبيت

وعرفت الله

فوقفت معاه

من اول سبحانك وعافيت

ولا غنا ولا صيت

دا الشعر الخيط

ملضوم في النول

علي قد ماتعرف حاجه تقول

ماتقولش تعبت ولا استكفيت

بالغنا والصيت

حوش يا حواش .. ده قال ومخلاش .. هايكتب وانا اغنى اهو كده يا بلاش

بيت النتاش ما يعلاش .. وانت اللى بيتك عاش .. يا عطية شواش

الحمدلله انها عجبتك

كل عام وانت بخير يارب

تحياتى لك