لو هتحلم وانت صاحي

لو هـ تحلم

لو بتحلم وانت نايم
حلم مش عاجبك هتصحي
حتى اهل الكهف صحيوا
بس لو فكرت تحلم وانت صاحي
يبقى كبرت القضية
يبقى تتحمل عواقب حلمك
اللي عنك مدارية
لما تحلم وأنت نايم
يعني هتغمض عنيك
أما وأنت صاحي يعني
هتشوف النقيض
والنقيض والحلم صعب
يجتمعوا ف عنية
فكرت كتير
واييست ورحت مفتحهم
وحلمت وقولت ماهيش فارقة
م الأعور ضربوه علي عينه
فضلت يعني زى ما هية
ويارتني ما كنت اتعنترت
وعملت أبو زيد و اشطرت
تعرف حصل إيه لما حلمت
و أنا ماشي مروح باليل
العمر اللي انا عيشتة ف ثانية
نور لي فلاش وكلاس بيصرخ
فلقتني
برفع كفيني على عنيا
و بغمض غمضة
واحد رايح مش راجع
مع هزة قوية وصوت مبحوح
بيقولي يا حاتم قوم اصحى
كلت انت كتير م التقلية
فتحت عنية لقيت سلمى
ماسكة ف بجامتي بتتمرجح
ومراتي بتزق في كتفي
نايم وكاني في جمعية
فضحكت
ورفعت أديا لفوق وحمدت
المولى اني مموتش
وحلفت
وحلفت ما هاكل و أنام
إلا لما غطايا يغطيني
من شعري لأخر رجليا