هابي يير ؟؟؟؟؟؟؟

كل عام وانت بخير
والسنه الجايه تلاقيني
وانا فرحان والرزق كتير
مش تعبان ولا مهدود حيلي
ولا واقف للعيش طوابير
ولا بجري وشايل انبوبه
فاضيه وغازنا راح للغير
ولا رايح اعمل عمليه
سهله وخايف م التخدير
لا الدكتور يسرق من جسمي
حاجه عشان باعها بكتير
ولا نايم حاضن باسبوري
بحلم عن اراضيكي اطير
ولا حاسس بمراره ف زوري
وانا قاعد بسمع تقرير
ماتوا الاف راكبين عباره
ياه ياخساره الوضع خطير
ومئات ماتوا تحت عماره
بس صاحبها لسه بخير!!!!!
وسويقه سموها دويقه
تحت الصخره قتلا كتير
وشحنة قمح مسرطنه فاسده
داخله بلادنا معاها غفير
يحرسها لغاية مايكلها
ناس غلبانه ماليها نصير
او يروا زرعتنا مجاري
ويبيعوا من غير تسعير
والشعب الطيب اهو بياكل
مابيسمعش واصله ضرير
وياما كتير خبرا في بلادي
بيعلموا فن التزوير
ودمانا ف اكياس مسمومه
مين يشتري والسر ف بير
وحريقه ف مجلس للشوري
وسببها من غير تفكير
عقب سجاره منه شراره
طارت من واحد سكير
او ماس بيكهرب.. ليه مستغرب
اصل ده كله قضي وتقدير
او منحل عاقله اختل
شايف كل الناس عصافير
او واحد ومطول دقنه
عضو جماعه للتكفير
ديه براهين دايما يقولوها
والناس تاه منها التفكير
لكن اوعوا الياس يعشش
في عقولكم دا الياس خطير
مش هيأس ابدا يابلادي
هفضل احلم بالتغيير
اخلاقنا راح ترجع تاني
صدق وطيبه معاها ضمير
سنه بتعادي يابلدي ياحلوه
وبقولك دايما هابي يير

الاستاذ الشاعر

فارس القرشى

ربنا يحقق امانينا وتختفى تلك السلبيات .

وتعود مصريتنا الى من خالفوا القوانين والشرائع .

احييك على جمال نصك الرائع . وطريقتك فى الطرح

وموضوعك الذى كتبته بخاصيه لايتمتع بها إلا فارس القرشى .

تقبل مرورى وخالص تقديرى ...