الفـــــخ

الفـــــــــخ

,,,,,,,,,,,,,,

نصبينوا فخ وطراخ طِراخ
ف دماغنا يابا دحونا دح
بفلول عنيده وفلوس اكيده
عماله تصرف وبشكل صــــح
بنشوف عمايل نسمع هوايل
تتعب قلوبنا وتزيد عذابنا
ودموع عينينا بتسح ســــح
بنقول مطالب ونقوم نطالب
بحقوق شبابنا ودماء ولادنا
والصوت يا عمي انبح بــح
تدخل معانا ايدين جبانه
تجمع حجاره بس بشطاره
تعمل اغاره لجيش وشرطه
تصبح اثاره وتقلبها طخ
واحنا غلابه فينا الطيابه
واقفين مكنا تاركين عملنا
والوقت خانا وظروف بلدنا
بقت خطيره والايد قصيره
خايف نلاقي كل اللي باقي
اطلال حزينه وتضيع مدينه
والخير ياعيني بايدينا شح
نفسي ف وزاره فيها الشطاره
تمشي بجساره تبني العماره
مش ايد طريه وعقول غبيه
شايفه الحكايه سهله وعاديه
فين الشطاره يااهل الاداره
عايزنها ترجع تاني مناره
ويعود تاريخها مهد الحضاره
سهله العباره واضحه الاماره
ولا المهاره ف ايدينا بـــح