أسكندرية2011 -2010

الأسكندرية 2011-2010

العصرية على
كورنيش أسكندرية
سنة راحت وسنة
فى السكة جاية

ومصرفى حضن البحر
ضاممها بحنيـة
فى كل عين دمعة
ودمعة على الخد جارية

البحر شكله زعلان
وكاتم صرخة مدوية
أنا قـلت أروح
أتابع النشرة الجوية

هما يومين عدوا
وهبت نوة عاتية
البحر ثايروأمواجه
عالية وعفية

وبعد ماهدأت النوة
وضحت الرؤية والنية
فى ليلة رأس السنة
والناس كلها ملهية

إنفجار جواركنيسة
ودماء أبرياء سايلة
جرى لك آيه يابلد
أحوالك ليه بقت مايلة

ليه ناسك أتغيروا
وهموم كثير شايلة
عجزتى وأتقهرتى
كإنك خلاص زايلة



فين ولادك الطيبين
فين رجالتك الهايلة
ضاعوا فى الغربة
ولا هنا فى خيلة

وشبابك عايشين
ومـش حاضرين
لازقين على النت
طبعا ماهم فاضيين

نسوا يعملوا حسابهم
كإنهم مش موجودين
محمد وبيتر وسالى
وشباب زيهم ثانيين

فى الميدان أتجمعوا
يوم خمسة وعشرين
طالبين عدل وتتغيير
وكرامة البنى آدمين

قالوا معاهم أجندات
و عملاء مدسوسين
حرام عليكم كفايـة
قد كده إنتم مغيبين

ولا الظلم عماكم
وخلاص مش شايفين
ضربوهم وأخدوهم
عالسجون متجرجرين

متخلف مين يرمى
الورد فى الزنازين
كانت اللطمة قوية
فجرت قهر سنين


صحت المارد
خلته فاق من العلة
فتـح القـزازة
وقام طير الفلة

زاح الطغاة
وكسر وراهم قلة
والعالم شافك يامصر
بتقومى من زلة

ثلاثين سنة وإنت
مركونة فى الضلة
كاتم عليكى كابوس
زود الطين بـلة

أهى غارت أيامه
وبشاير الخير هلة
وشعبك رفع رأسه
وإسمك بقى له طلة

وولادك إيد واحدة
مهما كانت الملة
حقك علينا يا مصر
حا نقول لا وكلا

و نرجع حقك وحقنا
ومش حا ندخل
قزازة ثـانى
ويقفلوا علينا بفلة