المخطوف

بسم الله الرحمن الرحيم

المخطوف

كنت انا ماشى ف شارع ضلمة
خالى من العالم و الضى
واتهيق لى ولو لثوانى
ان انا وحدى ف كل الحى
وفجاءه ف لحظة كده على غفلة
طخ طراخ و صرخت انا اى !!!!!!
ضربه شديدة كانت على راسى
فقدت انا وعيى و اغمى عليا
واما انا فقت لقتنى ف دنيا
لاول مره تشوفها عنيه
دقت ساعتها بجد الخوف
لما لقتنى يا ناس محدوف
مرمى ف اوضه غريبه كئيبه
ولقيت قلبى حزين مرجوف
واما انشق جدار الاوضه
برضه يا ساده ما جاش النور
كانت الاوضة عتمه وسودة
رحت انا واقف كده منتور
وبداءت اتجراء واتكلم
ممكن اعرف انا هنا ليه ؟
قالو جي لنا عشان تتعلم
رديت قلت اتعلم ايه ؟
قالوا تتعلم ان اخواتك
سرقوا حياتك باستهبال
وانك حتة ترس ف آله
لو شذ هيترمى فى الحال
وانك فرع هزيل ومخوخ
وما لوش جدر اصيل يحميه
نرويه لكن لو هيبوخ
نقطفه م الارض ونرميه
قلت لهم هرفض اتعلم
هعصاكم وهسوق فى جنانى
ردوا عليا بكل بساطة
يبقى خلاص مش هترجع تانى
وقالولى وبصوت ممطوط
وبنبره مليانه جنان
ان الماضى كان مغلوط
وان الحاضر عمره ما كان
والمستقبل مش مظبوط
ولاعاد فية احلام وامان
وخلاص طايحة ريح الموت
وهروبى مش فى الامكان
الا ان كنت معاهم افوت
ارقص جاز واغنى كمان
وانسى السيف ويا النبوت
واتخرج من هنا مليكان
واما لقونى ساكت خالص
وبدات اتعب خالص خالص
قالوا معانا ردد ردد
كل كلامنا راح يتخلد
اى علام قبلنا يتبدد
ردد ردد ردد ردد
حسيت انى بدوخ وبضيع
جالى هبوط جامد وسريع
فجاءه بقيت مستاءنس خالص
فجاءه بقيت هادى ومطيع
ولقتنى مكمل وياهم
بكيان رافض حاله وشاكى
كانوا بيقولوا وارد وراهم
غصبن عنى وبلسان باكى
ان لويس الغازى الخادع
جه يبنى لنا بيوت وجوامع
وان هولاكو د مجدع طيب
كبَّر خضَّر غيط ومزارع
وان رموز الشر القاسيه
كلها خير دمعتها قريبة
والشياطين ف الاصل ملايكه
فيها براءة وفيها الطيبه
والحدايه محبه هدايه
وبترمى لنا يا خلق الطير
وان الآخر كله مزايا
عنده شهامه وذوق وضمير
وقالولى نصيحة يا تاعبنا
لو بتحب الدنيا بجد
يبقى ساعد نفسك وساعدنا
واوعى ف يوم تهتم بحد
ايه بغداد ولا فلسطين ؟؟
ولا سودان غلبان و ايران
ايه يعنى لو شيلت الطين ؟؟
وصبحت لقيتنا ف اسوان
عشت العمر واكل فضلتنا
فشمعنى هترفض قلتنا ؟؟
ما الغلة كانت ويانا
والميه هتصبح ميتنا !!
ايه يعنى لو لينا مطامع
نسرق ثورة تعز ودرعا
مش راح تقدر تعمل حاجه
ولا شىء ابدا راح يمنعنا
واوعى تصدق انك ثائر
وانك تقدر ع الازمات
وانك اصيع منا وقادر
اكمننا شقر وخواجات
كبر راسك واوعى تجادل
وما تعملش شجيع ومناضل
مهما تعاند مش راح تاخد
غير القهر وشرب حناضل
دحنا نجوم الليل اللامع
واحنا سنان ونياب العو
خليك طيب خليك تابع
فقت للحظه وقلت ولو
{ لويس التاسع غازى وطامع }
{ وهولاكو كان غول شرير }
{ ولا كنش ابوك اصله ملاك }
{ ولا امك راح ترمى الطير }
{ كل رموز الشر المر }
{ هيفضلوا شر وهفضل خير }
{ هفضل رافع راسى وانادى }
{ عنادى جهادى بدون تقصير }
{ واخواتى ماسرقوش اوقاتى }
{ دى اصول الوقفه مع الاخوه }
{ بس عشان طبعك خوجاتى !! }
{ فما تعرفش اصول النخوة }
{ عمرى ما هقبل اكون دلدولك }
{ وكرامتى عمرى ما هبلعها }
{ واخر قولى اللى هاقولهولك }
{ بكره سنانك دى هخلّعها }


دب

دب

ترااااااااااااااااااااااخ


اىىىىىىىىىىىىىىىىىىىى


تمت

محمود قطب